Osasunaren egoera EBn proiektuaren testuinguruan argitaratu den txosten berri batek erakusten duenez, osasun-sistema berritzaile eta erresilienteak behar ditu Europak, osasun-laguntza hobetu eta lehiakortasuna sustatzeko. Estatu kideak, EBren finantzaketaren laguntzaz, aurrera egiten eta aldaketa erabakigarriak abiarazten ari dira jada, premiazko erronkei aurre egiteko; halako erronkak dira, besteak beste, biztanleriaren zahartzea eta gaixotasun ez-kutsakorrak.
Akonpainamendu-txostenak lau hobekuntza-eremu erabakigarri identifikatzen ditu: gaixotasun ez-kutsakorrak, osasun digitalaren eraldaketa bizkortzea, arreta primarioa sendotzea eta produktu farmazeutikoetarako eta berrikuntzarako sarbide irisgarria bultzatzea.
Europako Batzordeak, Ekonomia Lankidetza eta Garapenerako Antolakundeko (ELGA) Osasun Dibisioak eta Osasun Sistema eta Politiken Europako Behatokiak parte hartu dute Osasunaren egoera EBn proiektuan, zeina Batzordeak atera baitzuen 2016an eta UEproSalud programak finantzatzen baitu. Osasunari eta osasun-sistemei buruzko datu eguneratuak eta azterketa sakonak biltzea da helburua, baita alderdi interesdunei informaziorako sarbidea erraztea ere. Izan ere, oinarri enpirikoa sendotzen du horrek guztiak EBn osasun-sistemen funtzionamendua hobetzeko lanean diharduten osasunaren arloko arduradun politikoentzat eta beste alderdi interesdun batzuentzat.
