Europako Ingurumen Agentziak (AEMA) argitara eman du Europako ingurumenaren egoerari buruz bost urtez behin ematen duen txostena, non aurrerapen nabarmenak erakusten diren berotegi efektuko gasen (BEG) isurketak eta kutsadura atmosferikoa murrizteko lanean. Hala ere, ahaleginak areagotu behar dira, klima aldaketak eta ingurumenaren degradazioak arrisku handiak dakartzatelako Europako oparotasun ekonomikorako, lehiakortasunerako, segurtasunerako eta bizi kalitaterako. AEMAren txostenean nabarmentzen den bezala, Europako baliabide hidrikoak presio larriaren eraginpean daude. Estres hidrikoak, gaur gaurkoz, Europako lurraldearen %30i eta biztanleriaren %34ri eragiten die. Beraz, EBren politikak eta helburuak aplikatzea eta gure ekonomiaren eta ingurumenaren arteko loturak berrikustea funtsezkoak dira, gizarte osasuntsua eta ekonomia lehiakorra bermatuko baditugu.
AEMAren txostenak, datu zientifikoetan oinarrituta, klimaren arloan EBk duen lidergoa azpimarratzen du, BEG emisioen eta erregai fosilen erabileraren etengabeko murrizketari esker eta, aldi berean, energia berriztagarrien kuota nabarmen handitzen eta efizientzia energetikoa hobetzen ari baita. Izan ere, txostenak erakusten du EBk berotegi efektuko gasen (BEG) barne isuriak %37 murriztea lortu duela 1990etik hona. Aurrerapen garrantzitsuak lortu dira, besteak beste, airearen kalitatean, hondakinen birziklapenean, berrikuntzan, enplegu berdean eta finantza jasangarrietan. Adibidez, AEMAren txostenaren arabera, airearen kalitatea hobetzeko EBren politikek biziak salbatu dituzte, eta partikula finei egozten ahal zaizkien heriotza goiztiarrak %45 murriztu dira, 2005 eta 2022 bitartean.
38 herrialdetako datuak aztertu ondoren, txostenak dei egiten du Europako natura biziberritzen, biodibertsitatea babesten eta kutsadura murrizten jarraitzeko, Europako ingurumenaren egoera orokorrak hobetzen jarraitu behar baitu. Baliabide naturalak babesteak, klima aldaketa arintzeak eta horretara egokitzeak eta kutsadura murrizteak Europaren erresilientzian lagunduko dute. Europar Batasuna erronka horiei aurre egiteko neurriak hartzen aritu da, eta kontinente garbi, jasangarri eta erresiliente baten alde lan egiten jarraitzen du, gure klima eta ingurumen helburuetarako norabideari eutsiz.
