Europako Batzordeak kontsulta publikoa egin du, eta bertan alderdi interesdun guztiak animatu ditu iruzkinak aurkeztera, Teknologia transferentziako kategorien araberako salbuespenen erregelamendu berrikusiari («TTCER») buruzko zirriborroari eta Tratatuaren 101. artikulua teknologia transferentziako akordioei aplikatzeari buruzko gidalerro berrikusiei («Gidalerroak») dagokienez.
Teknologia transferentziako akordioen bidez, enpresa batek beste bati baimena ematen dio eskubide teknologiko jakin batzuk erabiltzeko –hala nola patenteak, diseinu eskubideak edo softwarearen egile eskubideak–, ondasunak edo zerbitzuak ekoizte aldera. Akordio horiek teknologiaren hedapena errazten dutenez eta ikerketa eta garapena sustatzen dituztenez, lehiaren aldekoak izan ohi dira, baina akordio horietako murrizketa batzuek ere eragin kaltegarriak izaten ahal dituzte lehian.
Testuinguru horretan, RECATTek salbuetsi egiten ditu teknologia transferentziako akordio batzuk, Europar Batasunaren Funtzionamenduari buruzko Tratatuaren (EBFT) 101. artikuluaren 1. apartatuan ezarritako lehiaren aurkako akordioen debekuaren baldintza jakin batzuk betetzen dituztenak, hain zuzen, teknologiaren hedapena errazteko, ikerketarako eta garapenerako pizgarriak indartzeko eta berrikuntza sustatzeko. Enpresek teknologia transferentziako akordioak RECATTen baldintzen arabera diseinatzen badituzte, segurtasun juridikoa dute beren akordioek 101. artikulua betetzen dutela ziurtatzeko orduan.
Gidalerroek orientazioa ematen dute bai RECATTen aplikazioari buruz, bai, EBFTren 101. artikuluarekin bat etorriz, RECATTen aurreikusitako kategorien araberako salbuespenak estaltzen ez dituen teknologia transferentziako akordioen ebaluazioari buruz.
RECATTen berrikuspena eta Gidalerroak egungo arauen ebaluazioaren ondorio dira, zeinak 2014tik aplikatu baitira. Ebaluazioa 2024ko azaroan osatu zen, eta berrikuspenaren helburua arauak egokitzea da, merkatuaren duela gutxiko bilakaera eta Europar Batasuneko Justizia Auzitegiaren jurisprudentzia islatzeko, bai eta segurtasun juridiko gehigarria ematea ere teknologia transferentziako akordioak egin nahi dituzten enpresei.
