Europar Batasunaren 2026ko urteko aurrekontuaren proiektua aurkeztu du Europako Batzordeak. Proiektua Europar Batasunaren epe luzerako aurrekontuaren (2021-2027) bitarteko berrikuspenean oinarritzen da, zeinak aurreikusi gabeko gertakari berri batzuei heldu behar izan baitzien, hala nola mundu mailako pandemiari, krisi energetikoari eta mundu mailako tentsio geopolitikoen gorakadari. Egindako berrikuspenean oinarrituta, 2026ko urteko aurrekontuak Europar Batasunaren lehentasunak babestuko ditu: Ukrainari laguntzea, lehiakortasuna, migrazioaren kudeaketa, segurtasuna eta defentsa, inbertsio estrategikoak, eta trantsizio ekologikoei eta digitalei etengabeko laguntza ematea.
2026ko aurrekonturako proiektua 193.260 milioi eurokoa da, eta, gutxi gorabehera beste 105.320 milioi eurorekin osatuko da, koronabirusaren pandemiaren ondoren Europar Batasunak susperraldi ekonomikoari laguntzeko martxan jarritako NextGenerationEU tresnaren bidez.
Europar Batasunaren lehentasun estrategikoak finantzatzeaz gain, aurrekonturako proiektuak finantzaketa gehigarria aurreikusten du, kohesioa indartzeko bitarteko berrikuspenean oinarrituta egindako proposamenaren esparruan. Proposamen horrek Europar Batasuneko herrialdeak bultzatzen ditu kohesioaren finantzaketa birprogramatzera eta gorabidean dauden lehentasunak indartzera, hala nola lehiakortasuna, defentsa, etxebizitza eskuragarria, erresilientzia hidrikoa eta trantsizio energetikoa.
