Batzordea neurriak hartzen ari da, bai EBkoak ez diren lineako txikizkariek, bai EBkoak ez diren merkatariak barne hartzen dituzten merkatuek saldutako balio txikiko inportazioetatik eratorritako arriskuei aurre egiteko.
Ekintza horiek Batzordeak merkataritza elektronikoari buruz proposatu duen komunikazio honen parte dira: «EBren tresna kutxa globala, merkataritza elektroniko seguru eta iraunkor baterako». Batzordeak ekintzak sustatzen ditu, besteak beste, aduanen eta merkataritzaren eremuetan, hala nola aduana kontrolak abian jartzea, kontsumitzaileak babestea eta zerbitzu digitalei eta merkatu digitalei buruzko legeak aldarrikatzea.
Iaz, balio txikiko 4.600 milioi bidalketa inguru sartu ziren EBko merkatuan, 150 eurotik beherako salgaienak, hain zuzen; hau da, egunean 12 milioi pakete sartu ziren. Kopuru hori da 2023koa halako bi eta 2022koa halako hiru, eta salgai horietako askok ez dute Europako legeria betetzen. Hazkunde esponentzial horrek kezka ugari sortzen ditu. Batez ere, gero eta gehiago dira EBn sartzen diren produktu kaltegarriak. Gainera, jardunbide desleialek eta lineako merkatuen bidez saldutako produktu faltsutuek kalte egiten ahal diete Europako saltzaileei, zeinek produktuei buruzko gure arau zorrotzak errespetatzen baitituzte. Amaitzeko, bidaltzen eta garraiatzen diren pakete ugarik ingurumen eta klima aztarna negatiboa dute.
Europan, kontsumitzaileek merkataritza elektronikoaren potentzial osoa baliatu behar dute, eta aukera izan behar dute lineako produktu erosoak, eskuragarriak, seguruak eta kalitate handikoak eskuratzeko. Era berean, Europako enpresek baldintza berdintasuna baliatu behar dute merkatu bakarrean.
