Ursula von der Leyen Batzordeko presidenteak eta Anwar bin Ibrahim Malaysiako Lehen Ministroak iragarri dute berriro hasiko direla negoziazioak EBren eta Malaysiaren arteko merkataritza askeko akordio anbiziotsu, moderno eta orekatu bat lortzeko. Malaysiaren laugarren merkataritza-bazkidea da EB: 2023an, 45.000 milioi euroko merkantzia-merkataritza izan zuten, eta 2022an, 11.000 milioi euroko zerbitzu-merkataritza. Malaysiarekin lotura komertzialak estutzeak —Asiako hego-ekialdeko ekonomia nagusietako bat— EBren lehiakortasuna eta segurtasun ekonomikoa bultzatzen ahal ditu, negozio-aukera berrien eta hornikuntza-kate sendoagoen bidez, esportazio-aukera berriak desblokeatuz eta lehengai-iturrietarako sarbidea hobetuz.
Hitzarmenaren helburua izanen da EBren eta Malaysiaren arteko harremana lan-eskubideen eta klimaren eta ingurumenaren babesaren inguruko konpromiso sendoetan oinarritzea, eta, aldi berean, EBk azkar hazten ari den Indo-Pazifikoko eskualdearekin duen konpromiso estrategikoa sustatzea.
EBk eta Malaysiak konpromisoa hartu dute akordioaren inguruko elkarrizketetan azkar aurrera egiteko, eta proposatu dute hurrengo hilabeteetan egitea negoziazioen lehen txanda garrantzitsua egitea. EBren testu-proposamenak negoziazioen lehen txandaren ostean argitaratuko dira, EBren gardentasun-politikarekin bat eginez. Bestalde, jasangarritasunaren inguruko ebaluazioa ere egin da, negoziazioei laguntzeko, eta hitzarmenak ekonomian, ingurumenean, gizartean eta giza eskubideetan izaten ahal dituen ondorioak aztertzen dira ebaluazio horretan.
