Amparo López Barneko, Funtzio Publikoko eta Justiziako kontseilariak topaketa batean parte hartu du Jakan, ALERT-PYR mugaz haraindiko koordinazio proiektuan parte hartzen duten gainerako eskualdeekin batera. Proiektuaren helburua da segurtasun zibileko misioak eta ondasunen, pertsonen eta ingurumenaren babesa optimizatzea Garona Garai, Pirinio Garai eta Pirinio Atlantikoetako departamenduen (Frantzia) eta Aran bailara, Aragoi, Nafarroa eta Gipuzkoaren artean mugakide diren lurraldeetan.
ALERT-PYR proiektuak jarraipena ematen die ALERT proiektuaren aurreko deialdian hasitako lan ildoei, eta mugaz haraindiko lankidetzan sakontzen du larrialdi egoeretan. Guztira, 4.995.019 euroko aurrekontua du, eta Europar Batasunak % 65 finantzatzen du, Interreg VI-A Espainia-Frantzia-Andorra (POCTEFA 2021-2027) programaren bidez. POCTEFAren helburua da Espainia, Frantzia eta Andorrako mugaldearen integrazio ekonomikoa eta soziala indartzea.
ALERT mugaz haraindiko proiektua (akronimoak “Espazio Komun batean Mugaz Haraindiko Arriskuei Aurre Hartzea eta horien aurka Borrokatzea” esan nahi du gaztelaniaz) helburu honekin sortu zen: mugaz haraindiko perimetroan ingurumenaren babesa hobetzea eta mugaren bi aldeetako larrialdietarako baliabideak arindu eta koordinatzea.
POCTEFA proiektu hori lehena izan zen Pirinio Atlantikoetako (Frantzia), Gipuzkoako, Nafarroako eta Aragoiko suhiltzaileei elkarrekin lan egiteko aukera ematen, esku hartzeko teknikak harmonizatzeko eta giza baliabideak eta baliabide materialak partekatzeko asmoz, pertsonak, ondasunak eta ingurumena babesteko misioen esparruan. Suhiltzaileen zerbitzuen mugaz haraindiko lankidetzarako lehen urratsa izateaz gain, programa horrek agerian jarri zituen elkarrekin lan egiteko benetako gaitasuna eta borondatea.
Proiektuaren lehen fase horretan, segurtasunaren arloko hainbat helburu lortu ziren, eta, adibidez, 2021eko martxoan Berako sutea itzaltzeko, funtsezkoa izan zen eskualdeen arteko lankidetza. Era berean, mugaz haraindiko espazioetako segurtasun planoak egin ziren, hala nola Jaizkibel mendikoa (Gipuzkoa), Donejakue bidekoa, mugaren inguruko bentetakoak edo eski estazioetakoak.
