Europa feminista baten alde lan egitea eta emakumeen aurkako indarkeriari aurre egitea lehentasunezkoa da EBko Kontseiluaren Espainiaren Lehendakaritzarentzat, konpromisoa hartu baitu Europan gaiari buruzko lehen arau espezifikoa bultzatzeko.
Azaroaren 25ean, urtero, Emakumearen aurkako Indarkeria Desagerrarazteko Nazioarteko Eguna ospatzen da, indarkeria hori giza eskubideen urraketa orokorrenetako bat baita mundu mailan. EB ez da salbuespena, eta horregatik da hain garrantzitsua Batasuneko zuzentarau baten bidez desagerraraztea.
Zifrek arazoaren muntaren berri ematen dute. Europar Batasuneko Oinarrizko Eskubideen Agentziaren arabera, EBko hiru emakumetik batek indarkeria fisikoa eta/edo sexuala jasan du.
Hala ere, Genero Berdintasunerako Europako Institutuak azpimarratzen duenez, zaila da emakumeen aurkako indarkeriaren guztizko irismena kalkulatzea, oraindik ere gutxitan salatzen baita eta estigmatizatua baitago. Horren ondorioz, salatzen diren kasuek errealitatearen zati bat bakarrik islatzen dute.
Nahiz eta estatu kideek gaiari heltzen dioten legeria nazionaletan, dauden planteamenduek segurtasun juridikorik eza sortzen dute, eta funtsezkoa da jarrera komun baten alde lan egitea.
Jarrera hori islatzen da Europako Batzordeak 2022ko martxoan emakumeen eta neskatilen aurkako indarkeria motak zigor arloan tipifikatzeko planteatutako zuzentarau proposamenean.
Proposamen horri buruzko eztabaidak aurrera egin duen bitartean, EBk beste urrats bat egin du Espainiaren Lehendakaritzan, indarrean jarri baita Emakumeen aurkako indarkeria eta etxeko indarkeria prebenitzeko eta borrokatzeko Hitzarmena, Istanbulgo Hitzarmena izenekoa.
