Batzordeak zenbait gomendio argitaratu ditu, estatu kideek koordina dezaten legez kontrako edukiak (eduki terroristak edo gorroto diskurtsoak, esaterako) zabaldu eta hedatzeari ematen dioten erantzuna, eduki horiek segurtasun publikorako mehatxu larri bihurtu aurretik. Asmoa da estatu kideek Batzordeari babesa ematea, berak zaindu behar baitu lineako tamaina handiko bilatzaileek eta plataformek guztiz betetzen dituztela Zerbitzu Digitalen Legeari jarraikiz dituzten betebehar berriak, estatu kideek Zerbitzu Digitalen Legea betearazteko zeregina beren gain hartzeko ezarritako epea baino lehen.
Aurrekaririk gabeko egoera da oraingoa, gatazkaz eta ezegonkortasunez betea, eta Europar Batasunari eragiten dio, batetik, Errusiak Ukrainaren aurka hasitako eraso gerra dela eta; eta, bestetik, Hamasek Israelen gauzatutako eraso terroristak direla eta. Batzordeak espero du estatu kideek beren indarrak batzea, Zerbitzu Digitalen Legea azkar aplikatzeko. Zerbitzu Digitalen Legeak arau multzo bat ezartzen du lineako ingurune seguru, aurresangarri eta fidagarri baten alde EBn, oinarrizko eskubideak errespetatzeko eta, bereziki, adierazpen eta informazio askatasunaren alde. 2023ko abuztuaz geroztik, Zerbitzu Digitalen Legeak neurri aringarriak hartzeko eskatzen die lineako plataforma oso handiei eta lineako bilatzaile oso handiei, beren sistemen arrisku sistemiko espezifikoetara egokitutakoak, legez kanpoko edukien hedapenetik eratorritakoak barne.
