Europako Batzordeak arau-hauste prozedurak ireki dizkie 18 herrialderi, eta horien artean Espainiako Estatuari.
Europako Batzordea neurriak hartzen ari da EBko hainbat estatu kideren aurka, estatu horiek ez diotelako jakinarazi zer neurri hartu dituzten EBren zuzentarauak beren legeria nazionaletan sartzeko. Zuzentarau horien transposizioa egiteko epea duela gutxi amaitu da, eta estatu kide horiek ez dituzte EBren zuzentarauak osorik txertatu. Batzordeak eskatu die berehalako neurriak har ditzatela beren legeria EBren betekizunetara egokitzeko. Batzordeak epatze-gutun bat igorriko die estatu kide horiei, eta bi hilabeteko epea emanen die erantzuteko eta zuzentarauen transposizioa osatzeko. Hala egiten ez badute, Batzordea hurrengo fasera igaro daiteke eta arrazoitutako irizpen bat igorri.
Batzordeak estatu kideei eskatu die txerta ditzatela beren legedian Batasuneko merkatu elektrikoaren diseinua hobetzen duten EBko arauak, zehazki hornitzailea libreki hautatzeari eta energia trukatzeko eskubideari buruzkoak.
Epatze gutun
Europako Batzordeak arau-hauste prozedurak hastea erabaki du, zenbait epatze-gutun bidalita Belgika, Estonia, Irlanda, Grezia, Espainia, Frantzia, Kroazia, Letonia, Lituania, Luxenburgo, Hungaria, Malta, Herbehereak, Polonia, Errumania, Eslovenia, Finlandia eta Suediara, ez dutelako jakinarazi elektrizitate-merkatuaren diseinua hobetzeko EBko arau berrien transposizio osoa; arau horiek hornitzailea libreki hautatzeari eta energia partekatzeko eskubideari buruzkoak dira, eta 2024/1711 (EB) Zuzentarauan ezarri ziren.
2024/1711 (EB) Zuzentarauak elektrizitateari buruzko aurreko zuzentarauak aldatzen ditu —2018/2001 (EB) eta 2019/944 (EB) Zuzentarauak– Batasuneko elektrizitate-merkatuaren diseinua hobetzeko. Estatu kideek 2026ko uztailaren 17a baino lehen jakinarazi behar zuten hornitzailea libreki hautatzeari buruzko xedapenaren transposizioa (4. artikulu aldatua), baita energia trukatzeko eskubideari buruzko xedapenarena ere (15 bis artikulu berria). Xedapen horien helburua da kontsumitzaileek elektrizitate-merkatuan duten posizioa indartzea, ahalmen handiagoa izan dezaten hornitzailea hautatzeko eta aldatzeko, eskaintza lehiakorrago eta berritzaileagoak lortzeko eta energia-sisteman modu aktiboagoan parte hartzeko.
Bi hilabete erantzuteko
Gaur egunera arte, 18 estatu kide horiek ez dute jakinarazi xedapen horien transposizio osoa egin dutenik legezko epearen barruan. Ondorioz, Batzordeak epatze-gutunak bidali dizkie estatu kide horiei. Orain, bi hilabete dituzte erantzuteko, transposizioa osatzeko eta Batzordeari jakinarazteko. Erantzun egokirik ezean, Batzordeak irizpen arrazoitua igortzea erabaki dezake.
