Europako proiektua indartzeko eta Batasun sendoagoa, egonkorragoa eta herritarrengandik hurbilagoa eraikitzeko lana aitortzen du sariak.
María Luís Albuquerque Finantza Zerbitzuetako eta Aurrezkiaren eta Inbertsioaren Batasuneko komisario europarra Iruñera joan da “Nafarroa, Europako Atea” Nazioarteko IV. Saria jasotzera. Diario de Navarra fundazioak eta Equipo Europa elkarteak batera ematen dute saria. Joaquín Almunia Europako Batzordeko lehendakariorde ohiak Albuquerquerekin partekatu du saria.
Sariak aitortza egiten dio biek Europako proiektua indartzen eta Batasun sendoagoa, egonkorragoa eta herritarrengandik hurbilagoa eraikitzen egindako lanari, eta nabarmentzen ditu, gainera, iberiar europazaletasunaren jarraipena eta Espainiak eta Portugalek Europaren etorkizunarekin duten konpromiso partekatua.
Batzordeko lehendakariorde ohia
Portugalgo Estatuko eta Finantzetako ministro izan zen Albuquerque, eta gaur egun Europar Batasuneko Finantza Zerbitzuetako eta Aurrezkiaren eta Inbertsioaren Batasuneko komisarioa da. Bere karrerak irudikatzen ditu Europako proiektuaren jarraipena, buruzagi iberiarren belaunaldi berri batean gorpuztua, eta Portugalen protagonismo gorakorra Europar Batasuneko erakundeetan.
Joaquín Almuniak, bere aldetik, belaunaldi bat ordezkatzen du, hain zuzen Espainia Europar Batasunean integratzea sendotu duena eta modu erabakigarrian herrialdea Batasuneko erakundeetan eragile errespetatu eta eragingarri bihurtu duena. Espainiako Gobernuko ministroa izan da, eta hamarkada batez Europako Batzordean aritu da, lehenik Ekonomia eta Moneta Gaietarako komisario eta, ondoren, lehendakariorde eta Lehiarako komisario.
Europazaletasuna
Epaimahaiak honako hau aitortu nahi izan du: “Europako proiektua zabaltzeko ekimenei eta Europaren eraikuntzarekin konprometituta dauden belaunaldi berriei etengabe eman dien laguntza, Espainiako europazaletasunaren erreferente handi bihurtu duena”.
Albuquerquek eta Almuniak bidaia aprobetxatu dute María Chivite Navascués lehendakariarekin biltzeko
