Eurodiputatuek EBko Elkartasun Funtsaren dirua emateko proposamena onetsi dute aldeko 642 botorekin, aurkako 13rekin eta abstentzio batekin.
Europako Parlamentuak onetsi du 144,1 milioi euro ordaintzea Espainiari, Errumaniari eta Zipreri baso suteen, uholdeen eta bero boladen kalteei aurre egiten laguntzeko. Partidaren zatirik handiena, 120,55 milioi euro, Espainiara bideratzen da, 2025ean baso suteek ukitutako lurraldeak leheneratzen laguntzeko.
Estatuak dagoeneko jaso du 30 milioi euroko aurrerakina, eta Europar Batasuneko Kontseiluak (estatu kideek) ere onetsi beharko du laguntza, zenbatekoaren gainerakoa ordainketa bakarrean ordain dadin.
Elkartasun Funtsaren ordainketek berreraikuntzarako ahaleginak babestuko dituzte, barnean hartuta ur azpiegitura kritikoak leheneratzea, hondakin uren kudeaketa, telekomunikazioak, hezkuntza, garraioa eta kultura ondarea.
Era berean, funtsak esleituko dira aldi baterako birkokapenak eta larrialdietako erreskate zerbitzuak estaltzeko.
Elkartasun Funtsa
Espainiak beste batzuetan ere jaso ditu Elkartasun Funtsaren laguntzak, azken aldiz 2024ko Valentziako goi geruzetako depresio isolatua izan zela eta (946 milioi euro), baina baita 2022an Palmako sumendiaren erupzioaren ondorioz (9,5 milioi euro), COVID-19aren pandemiaren ondorioz (57 milioi), Lorcako 2011ko lurrikararen ondorioz (21,1 milioi) eta Prestigeren 2002ko krisiaren ondorioz (8,6 milioi) ere, besteak beste.
Europar Batasuneko Elkartasun Funtsa da hondamendi baten ondoren laguntza emateko EBren tresna nagusia. 2002an sortu zenetik, 10.000 milioi euro baino gehiago mobilizatu ditu, 147 katastroferi, 127 natura hondamendiri eta osasun publikoko 20
larrialdiri aurre egiteko EBko 25 estatu kidetan eta atxikitzeko hautagai diren sei herrialdetan. Baso suteen 2025eko denboraldia historiako suntsitzaileena izan zen.
