Europa osoan baso suteen arriskuak areagotu direnez, Europako Batzordearen laguntzaz finantzatzen eta koordinatzen ari da suhiltzaile, aireontzi eta larrialdietako aditu kopuru errekor baten hedapena, Babes Zibileko Mekanismoaren esparruan.
Europako 14 herrialdetako 777 suhiltzaile kokatuko dira estrategikoki Zipre, Grezia, Italia, Frantzia, Espainia eta Portugalgo arrisku handiko eremuetan. Parte-hartze mailarik handiena da, 2022an aurretiazko posizionamendu programa abian jarri zenetik. Aldi berean, suteak itzaltzeko EBko flotako 22 hegazkin eta 5 helikoptero prest daude, presiopean dauden herrialdeei laguntzeko.
Baso suteen denboraldiak gero eta luzeagoak direnez, lehenago hasten direnez eta suntsitzaileagoak direnez, Batzordeak bermatu nahi du suhiltzaile, aireontzi eta langile espezializatu gehiago izanen direla zerbitzu nazionalei laguntzeko prest, arrisku handieneko lekuetan eta uneetan.
Europako Batzordeko presidente Ursula von der Leyenek honako hau adierazi du: «Gure kontinente osoko suhiltzaileek misio bat partekatzen dute: pertsonak, etxeak eta basoak babestea. Operazio horren esparruan, orain arte egin dugun handiena baita, 800 suhiltzaile inguru hedatuko dira, aldez aurretik, arrisku handieneko eremuetan. Europako hegazkinekin, edozein unetan hedatzeko prest. Horrela funtzionatzen du Europako elkartasunaren ekintzak».
Batasuneko Babes Zibileko Mekanismoaren bidez, baso suteek kaltetutako herrialdeek laguntza operatiboa eskatzen ahal dute, gaitasun nazionalak gainezka eginda daudenean. Larrialdiei Erantzuteko Koordinazio Zentroak operazioen jarraipena bermatzen du, herrialde parte-hartzaileek emandako laguntza eskaintzak koordinatuz eta langileak, ekipoak eta gaitasun espezializatuak hedatzen lagunduz.
Informazio gehiago nahi izanez gero, kontsultatu prentsa oharra.
