Nafarroako Gobernuak Eskualdeko Ekonomia Politika Foroa hartuko du 2026ko maiatzaren 28an eta 29an, Europako funtsen kudeaketari, eskualde politikari eta lurralde kohesioari buruzko topaketa tekniko eta instituzionala. Baluarten, Nafarroako Biltzar Jauregian eta Auditoriumean, egin da ekitaldia, Iruñean; han bildu dira Europako funtsen kudeaketaz arduratzen diren administrazioetako ordezkariak, Ministerioko eta autonomia erkidegoetako eta hiri autonomoetako arduradunekin batera.
Lehen jardunaldian parte hartu dute Mikel Irujo Industriako eta Enpresen Trantsizio Ekologiko eta Digitalerako kontseilariak, Iñigo Arruti Nafarroako Gobernuko Enpresen Sustapenerako eta Azpiegituretako zuzendari nagusiak, Mercedes Caballero Europako Funtsen idazkari nagusiak eta Cristina Peña Ogasun Ministerioko Europako Funtsen zuzendari nagusiak.
Bi jardunaldi horietan aztertuko dira Europako Batzordearen auditoretzei, Ikuskaritzako eta Kontroleko Zuzendariordetza Nagusiaren kontrolei, 2014-2020 esparruaren emaitzei eta 2021-2027 aldiko erronkei lotutako gaiak. Programan aztertuko dira, halaber, EGEFen eta Bidezko Trantsizio Funtsaren kudeaketa, komunikazioa, informazio sistemak, laguntza teknikoa, ziurtapena eta ordainketak, Europako lurralde lankidetza eta hiri garapena.
Gainera, bigarren jardunaldian, Kudeaketa Agintaritzaren eta eskualdeetako bitarteko erakundeen arteko koordinazioari buruzko truke eta eztabaida saio bat eginen da, kudeaketa prozesuak hobetzeko proposamenak egiteko.
Foroa elkartuko da kohesio politikarako bereziki garrantzitsua den une batean, bereziki markatzen baitute 2021-2027 aldiaren hedapenak eta 2028-2034 Urte Anitzeko Finantza Esparruari buruzko eztabaidak. Testuinguru horretan, topaketak aukera emanen du gobernu mailen arteko lankidetza indartzeko, ikaskuntzak partekatzeko eta funtsen kudeaketa argiago, koordinatuago eta lurraldetik hurbilago baterantz aurrera egiteko.
