Lanei esker, Añarbe ibaiaren adarra den Enobieta errekaren jarraitutasun ekologikoa berreskuratuko da Urumearen arroaren barruan, eta Artikutzaren bihotzean kokatutako ingurumen-balio handiko ekosistema baten funtzionamendu naturala lehengoratuko da. Lanak azaroaren amaierara arte luzatuko dira, eta ibai-ekosistemak berreskuratzeko eta Kantauri itsasoko ibaiei lotutako espezieen eta habitaten kontserbazio-egoera hobetzeko Europako Life Kantauribai proiektuaren parte izango dira. Europar Batasunak kofinantzatutako programa horri esker, ibilguen konektibitatea berreskuratzeko eta ur-ekosistemen funtzionamendu naturala zailtzen duten oztopoak ezabatzeko jarduerak bultzatzen ari dira.
43 metroko garaierarekin, 180 metroko luzerarekin eta 35 metroko lodierarekin, Artikutzako presak Vezins presa frantziarra gainditzen du tamainari dagokionez. Presa horrek 36 metroko altuera du, eta partzialki eraitsi zuten 2019 eta 2020 bitartean. Esku-hartze hori, beraz, erreferente bihurtu da Europan, ibaiak lehengoratzeari dagokionez.
Jarduketak Kantauriko Konfederazio Hidrografikoaren baimena du, bai eta Trantsizio Ekologikorako Ministerioak ingurumenaren eta segurtasunaren arloan emandako aldeko txostenak ere. Aurrekontua 1,3 milioi eurokoa da; horietatik 640.000 euro Donostiako Udalak finantzatuko ditu, eta gainerakoa Life Kantauribai proiektuak.
Informazio gehiago
