EB-Mercosur behin-behineko merkataritza akordioa maiatzaren 1ean sartu da indarrean, eta berehalako eta benetako onurak ekarri dizkie EBko enpresei, langileei eta herritarrei. Gertaera hori ospatzeko, von der Leyen Europar Batasuneko presidenteak eta Antonio Costa Europako Kontseiluko presidenteak bideokonferentzia bat egin berri dute Mercosurreko buruzagiekin.
Akordioaren bidez, pixkanaka ezabatuko dira Mercosurrera esportatutako EBko produktuen % 91 baino gehiagori ezartzen zaizkien inportazioko muga-zergak, eta merkatu komun bat irekiko da, 700 milioi pertsonatik gora biltzen dituena. Bihartik aurrera, EBko esportazio nagusien —hala nola automobilak, farmazia produktuak, ardoa, likoreak eta oliba olioa— gaineko muga-zergak ezabatu edo nabarmen murriztuko dira akordioaren eraginez, eta aukera berriak sortuko dira berehala EBko enpresentzat, munduko merkataritza gune handienetako batean.
EBko nekazariek eta nekazaritzako elikagaien ekoizleek ere nabarituko dituzte muga-zergak murriztearen edo ezabatzearen ondorioak, eta, horrenbestez, beren produktuak lehiakorragoak izanen dira Mercosurren. Akordioaren bidez, EBtik eskualdera egiten diren nekazaritzako elikagaien esportazioak % 50 handitzea espero da; muga-zergen lehen murrizketak eta kontingenteak bihar sartuko dira indarrean. Horrez gain, Europako 344 Adierazpen Geografikok (IG), hala nola Parmigiano Reggianok eta Bordeleko ardoak, babes legala izanen dute Mercosurren bihartik aurrera, eta, horrenbestez, ez dira horien imitazioak sortzen ahalko gero eta handiagoa den kontsumo merkatu honetan. Aldi berean, nekazaritzako elikagaien EBko sektore sentikorrenek behar duten babes guztia jasoko dute, kontu handiz kalibratutako muga-zergen kontingenteei, aurrekaririk gabeko babes mekanismoari eta kontrol indartuei esker.
Maiatzaren 1ean, merkataritzarako muga ez-arantzelarioak eta teknikoak ezabatzen ere hasiko dira, egokitasuna, etiketatzea eta nazioarteko arauen betetzea ebaluatzeko arauak indarrean sartzeaz batera. Horren bidez, EBko enpresak errazago eta azkarrago aritzen ahalko dira. Era berean, kontratazio publikoko merkatuak irekiko dira, eta, horrenbestez, EBko enpresek gobernuek sustatutako kontratuak lizitatzen ahalko dituzte maila federalean eta estatu mailan, tokiko lehiakideen baldintza berberetan. Zerbitzuen esportatzaileek —besteak beste, finantzen, informazio teknologien eta garraioaren sektoreetan— berehala nabarituko dituzte onurak, lizentziak emateko arau argiagoak, prozedura ez-diskriminatzaileak eta langileak mugitzeko askatasun handiagoa izanen baitituzte. Aurreikuspenen arabera, 2040rako, irabazi konbinatu horien ondorioz, EBk Mercosur eskualdera egiten dituen urteko esportazioak % 39 indartuko dira, eta 50.000 milioi eurora iritsiko dira.
Kontseiluak urtarrilean erabaki zuen Batzordeari akordioa behin-behinean aplikatzeko ahalmena ematea, Mercosurreko herrialde batek lehen berrespena eman ondoren, eta, hain zuzen, erabaki horren ondoren egin da behin-behineko aplikazioa. Horrenbestez, otsailaren 27an, von der Leyen presidenteak iragarri zuen EB behin-behineko aplikazioarekin hasiko zela.
Online daude nekazaritzako elikagaien esportatzaileentzako eta ondasun eta zerbitzuen esportatzaileentzako behin-behineko eskaeraren abantailei buruzko xehetasun gehiago.Online kontsultatzen ahal da, halaber, EB-Mercosur Akordioari buruzko informazioa.
