Europako Batzordeak Munduko Osasun Erresilientziaren Ekimena onartu du. Estrategia horrek eragile fidagarri eta lehen lerroko gisa kokatzen du EB munduko osasunaren esparruan; hobetzen ditu, etorkizuneko osasun mehatxuen aurrean, mundu mailako prebentzioa, prestakuntza eta erantzuna, eta osasun sistemen erresilientzia arloko gabeziei heltzen die.
EBren etorkizuneko jardueretarako esparru estrategikoa ezartzen du, Europak azkarrago erantzuten ahal izan diezaien gaur egungo mundu interkonektatuko osasun-mehatxu eta -krisiei, sistema multilateral sendo batean eta bazkideekiko lankidetzan oinarrituta. Horrek are gehiago indartzen ditu EBren autonomia estrategikoa eta lehiakortasuna, eta laguntzaren mendekotasunetik osasun burujabetzara pasatzeko trantsizioa egiten laguntzen die gure bazkideei.
Munduko Osasun Erresilientziaren Ekimenean lehentasunezko bost esparru gako proposatu dira, EBk munduko osasunaren esparruan egonkortasunari eta jarduera kolektiboari egiten dien ekarpenari baliorik handiena ematen diotenak.
- Munduko osasun arkitektura eraginkorragoa eta ez hain zatikatua sustatzea.
- Herrialdeek bultzatutako osasun sistema erresilienteak lortzen laguntzea.
- Munduko osasun-mehatxu eta -krisien aurrean nazioarteko prebentzioa, prestakuntza eta erantzuna indartzea.
- Munduko hornidura kateak dibertsifikatzea eta funtsezko osasun produktuak fabrikatzea.
- Gizartearen erresilientzia indartzea, zientziarekiko konfiantza eta osasun arloko informazio okerraren eta desinformazioaren aurkako borroka sustatuz, munduko osasun politiken formulazioak lankidetzan eta datu zientifikoetan ainguratuta jarraitzen duela bermatzeko.
Lehentasun horiek martxan jartzeko, Munduko Osasun Erresilientziaren Ekimenean, nazioko, eskualdeko eta munduko bederatzi neurri enblematiko proposatu dira, prestakuntza eta koordinazioa hobetzeko eta mundu osoan sistema erresilienteak eraikitzeko. Aplikazioa 2026tik 2027ra bitartean hasiko da.
