Europako Batzordeak berariazko kontsulta bat eta datu-bilketa deialdi bat abiatu ditu EBko banku-sektorearen lehiakortasunari buruz. Ekimen horren helburua da EBko bankuek estatu zein mundu mailan duten funtzionamenduari buruzko informazioa biltzea, baita honako hau aztertzea ere: nola laguntzen duten Europako ekonomia finantzatzen, nola jarraitu merkatu bakarra eta EBko banku-batasuna sakontzen, eta nola erraztu eta hobetu arau- eta gainbegiratze-esparruaren eraginkortasuna.
Kontsultaren abiapuntua azken hamarkadan Europako bankuen erresilientzia indartzeko egindako aurrerapen garrantzitsuak dira; izan ere, arau-esparru sendo bat ezarri eta banku-batasuna sortu da, eta horrek finantza-egonkortasuna hobetu du EB osoan. Aldi berean, Europako bankuek are paper garrantzitsuagoa bete behar dute EBko ekonomiaren finantzaketan, eta EBren hazkundea, berrikuntza, inbertsioak eta lehiakortasuna indartzen lagundu behar dute.
Alde interesdunen oharrak Batzordeak 2026an EBko banku-sektorearen lehiakortasunari buruz eginen duen txostenean erabiliko dira, Aurrezki eta Inbertsioen Batasunaren estrategiaren barruan. Txosten hori 2026ko hirugarren hiruhilekorako aurreikusten da. Banku-sistemak merkatu bakarrean duen egoera ebaluatuko du, lehiakortasuna izanen du ardatz eta EBko banku-sektorearen etorkizunerako programa positibo, frogatua eta etorkizunera begirakoa finkatuko du.
Bankuak funtsezkoak dira Aurrezki eta Inbertsioen Batasunaren helburuak lortzeko, EBko enpresa eta familia gehienen finantzaketa-iturri nagusia izaten jarraitzen baitute eta funtsezko eginkizuna baitute aurrezkia inbertsio produktiboetara bideratzeko orduan. Alde interesatu nagusiak gonbidatuta daude parte hartzera: bankuak, finantza-erakundeak, agintari publikoak, kontsumitzaile-erakundeak eta inbertitzaileak, gizarte-solaskideak, banku-zerbitzuak erabiltzen dituzten enpresak, mundu akademikoa eta interesatuta dauden herritarrak.
Batzordeak gonbidapena luzatzen die alde interesatuei ekarpenak aurkez ditzaten, beranduenez, 2026ko apirilaren 19rako (berariazko kontsulta) eta 2026ko martxoaren 12rako (datu-bilketarako deialdia).
