Urtarrilaren 12tik 14ra, Europako Batzordeak Osasun Segurtasunerako Mundu Ekimenaren (G7+-eko herrialdeen eta erakundeen sare informala) bilera egin zuen Bruselan, osasun publikoaren arloko prestakuntza indartzeko eta mundu mailako osasunerako arrisku berriei buruz eztabaidatzeko. Bileran, osasun-mehatxu berriak eta sortzen ari direnak eztabaidatu ziren, bai eta taldearen lan koordinatua ere pandemien aurreko prestakuntzari eta mehatxu kimiko, biologiko, erradiologiko eta nuklearrei aurre egiteko moduari buruz, besteak beste.
Ekimena 2001eko irailaren 11ko atentatu terroristak gertatu eta gutxira sortu zen, osasun publikoari kalte egiten dioten krisien aurrean lankidetza hobetzeko, informazioa trukatzeko eta osasun-sektoreko jardunbideak koordinatzeko. Harrezkero, munduko osasun-segurtasuna hobetzen eta prebentzio- eta prestakuntza-gaitasunak indartzen lagundu du, koordinazio handiagoaren eta zaintza-, detekzio- eta erantzun-ahalegin nazionalei buruzko informazio-truke handiagoaren bidez. Europako Batzordea, Frantzia, Alemania, Italia, Kanada, Japonia, Mexiko, Erresuma Batua eta Estatu Batuak dira Osasun Segurtasunerako Mundu Ekimenaren kideak. Osasunaren Mundu Erakundeak aholkularitza teknikoa ematen du.
Aste hondarrean, Europako Batzordea Batasuneko Osasun Segurtasuneko Batzordearen goi-mailako bilera baten buru izanen da, EBko segurtasun sanitarioaren agenda eztabaidatzeko. Delegatuek Batasuna Prestatzeko Estrategia eztabaidatuko dute, Batasunak krisiei aurre egiteko duen prebentzio-, prestaketa- eta erantzun-plana eta EBren biltegiratze-estrategiak eta kontraneurri medikoak aplikatzea barne. Lankidetza zibila eta militarra eta hegazti-gripe zoonotikoa ere jorratuko dituzte.
Europar Batasuna osasunaren arloan indartsuagoa izateko, Batzordea lanean ari da osasun-politika nazionalak osatzeko eta osasunaren babesa EBren politiketan txertatzen dela bermatzeko. Osasun-segurtasuna bermatzea eta, beraz, osasunerako larriak izan daitezkeen mugaz gaindiko mehatxuak aktiboki prebenitzea, horiei aurre egiteko prestatzea eta horiei erantzutea EBren osasun-politikaren oinarri garrantzitsua da. Gure bazkideekin batera, Batzordea beti saiatzen da munduko osasun-erronkei elkarrizketaren eta lankidetzaren bidez heltzen, funtsezkoak baitira osasunaren segurtasunaren arloan prestatzeko. Horregatik, von der Leyen presidenteak Batasunaren egoerari buruz iaz emandako hitzaldiarekin bat etorriz, Batzordea lanean ari da Osasun Erresilientziako Munduko Ekimen berri bat prestatzeko, zeina urtearen hondarrean aurkeztuko baita.
Informazio gehiago online.
