Europako Batzordeak 1.000 milioi euro emanen ditu Egiptori laguntza makrofinantzarioa (MFA, ingelesez) emateko. Hori EBren eta Egiptoren arteko elkartze estrategiko integralaren konpromiso garrantzitsua da, 2024ko martxoan sinatua.
Finantza-laguntza horrek, 4.000 milioi euroko MFAren eragiketaren esparruan aurreikusitako hiru tarteetatik lehena, Egiptori egungo finantzaketa-premien zati bat asetzen eta egonkortasun makroekonomikoa bermatzen lagunduko dio. Herrialdearen erreforma ekonomikorako agendaren aurrerabidea ere babestuko du, Nazioarteko Diru Funtsaren (NDF) aribideko programarekin batera. Laguntza horrek Egiptoren ordainketa-balantzaren gaineko presioei aurre egiten lagunduko du, Errusiak Ukrainaren aurka egindako eraso-gerraren, Ekialde Ertaineko egoeraren eta Itsaso Gorrian izandako eraso huthien ondoriozkoak barne.
Batzordeak egindako ebaluazioan, Egiptok laguntza emateko baldintza guztiak betetzen zituela ondorioztatu zuen: lehenik eta behin, Egiptok EBrekin ordainketa hori jasotzeko adostutako politika ekonomikoko baldintza guztiak betetzen zituen; bigarrenik, herrialdeak neurri zehatz eta sinesgarriak hartu ditu mekanismo demokratiko eraginkorrak errespetatzeko, hala nola alderdi anitzeko parlamentu-sistema ezartzea, zuzenbide-estatua defendatzea eta giza eskubideak errespetatzen direla bermatzea; eta, hirugarrenik, NDFren programak MFAren funtsak ordaintzeko ezarritakoaren arabera jarraitzen du.
Politika ekonomikoko baldintzei dagokienez, Egiptok erreforma ekonomikoak ezarri ditu egonkortasun eta erresilientzia makroekonomikoa indartzeko, finantza publikoen kudeaketan eta kanbio-merkatuaren funtzionamenduan hobekuntzak egitea barne. Enpresa-ingurunea eta lehiakortasuna hobetzen ere aurrera egin da, bereziki industria-lurrak esleitzeko lizitazio lehiakorren bidez eta lizentziak online emateko modua erraztearen bidez. Era berean, trantsizio ekologikoaren sustapenean aurrera egin da, uraren eta energiaren kudeaketa barne.
