Ana Ollo Bigarren lehendakariorde eta Memoria eta Bizikidetzako, Kanpo Ekintzako eta Euskarako kontseilariak CEIN Startup Day ekimenaren irekieran parte hartu du gaur. Ekimena Nafarroako Enpresen eta Berrikuntzaren Europako Zentroa (CEIN) sozietate publikoak antolatu du, Noaingo Berrikuntza Haztegian. Sortu berri diren enpresen edo startup berritzaileen eta erakunde inbertitzaile eta korporazio handien arteko lotura izan da ekitaldi honen ardatza, eta 500 pertsona baino gehiago bildu ditu.
Ekitaldi honen bosgarren edizioa da, eta sortu berri diren enpresek eta Errioxako, Kantabriako, Valentziako Erkidegoko, Aragoiko eta Kataluniako eta erakundeetako ordezkariek hartu dute parte, zeinak Nafarroarekin batera Tech FabLab proiektuko kideak baitira. Emaitzak jardunaldian zehar aurkeztu dira.
Testuinguru horretan, jardunaldian zehar, osasunaren, teknologia digitalen (digi-tech) eta nekazaritza jasangarriaren (agro-green) sektoreetan sortu berri diren 52 startup eta proiektuk beren merkaturatzeak (aurkezpenak) aurkeztu dituzte funts inbertitzaile espezializatuen eta korporazio handien aurrean. Horrez gain, 57 startupek stand bat izan dute, eta 100 vis a vis topaketa baino gehiago egin dira, aurrez programatuta, startupen arduradunen eta erakunde inbertitzaile eta korporazioen artean.
Bestalde, zenbait mahai-ingurutan, hainbat arlotan sakondu da, hala nola joera globaletan, indarra ari diren sektoreetan, berrikuntza irekian edo startupetan inbertitzean arrakasta izateko gakoetan.
CEIN Startup Day jardunaldia, gainera, Tech FabLab proiektua aurkezteko ekitaldia izan da. Ekintzailetza digitalari laguntzeko sarea da Tech FabLab, eta Espezializazio Teknologikoko Lurralde Sareen (RETECH) programaren barruan dago. Espainiako Gobernuak sustatzen du, Suspertze, Eraldatze eta Erresilientzia Planaren esparruan, eta 248 milioi euroko aurrekontua du, Next Generation EU Europako funtsekin finantzatuta, eta horri autonomia-erkidegoek jartzen dituzten 87 milioi euro gehitzen zaizkio. Tech FabLabek 42 milioi euroko aurrekontua du guztira; horietatik 31,5 milioi Eraldaketa Digitalerako eta Funtzio Publikorako Ministerioak ematen ditu, eta 10,5 milioi euro, berriz, proiektuan parte hartzen duten sei autonomia-erkidegoek.
