Ana Ollo Bigarren lehendakariorde eta Memoria eta Bizikidetzako, Kanpo Ekintzako eta Euskarako kontseilariak ‘KINTONDARE’ mugaz gaindiko proiektuaren aurrerapenen berri izan du gaur. Ekimen horretan Esteribarko Udalak eta Eugi eta Zubiriko kontzejuek parte hartzen dute, Ia 3,5 milioi euroko aurrekontu globala du eta Foru Gobernuak 55.000 euroko ekarpena eginen du gehienez.
KINTONDARE proiektuaren izena aurreko Kintoan Barna proiektutik eta “ondarea” terminotik dator (euskaraz, lurraldeko hizkuntza komuna, “herentzia, ondarea, legatua”). Proiektu hau 2021-2027 programazio aldiko proiektuen Interreg POCTEFA lehen deialdira aurkeztu ondoren programatu zen. Proiektuan hainbat erakunde onuradun daude inplikatuta, Kintoan Barna lurraldeko biztanleekin batera. Kintoan Barna Pirinioen bi aldeetan dauden herriek osatzen dute, Kinto eskualdeko lurrak partekatzen dituzten Aldude, Esteribar, Erro eta Baztan ibarretan. Proiektu honi dagokionez, zehazki, Baigorri, Banka, Urepele eta Baigorriko Commission Syndicale de la Vallée dira, Nafarroa Beherearen aldetik (Frantzia); eta Esteribarko Udala eta Eugi eta Zubiriko kontzejuak, Foru Komunitatearen aldetik, Burdin Leku Elkarteak eta OPTBk erakunde elkartu gisa jarduten dutela.
KINTONDAREren balio erantsia honetan datza: harremanean landutako lankidetzaren heldutasunean, baterako lanean, eta lurraldeari eta haren etorkizunari buruzko eztabaidetan eta hausnarketetan. Gogoratu behar da proiektuak 3.446.315 euroko aurrekontu globala duela; horietatik 2.240.105 € (% 65) Eskualde Garapeneko Europako Funtsetik (EGEF) datoz, eta etorkizuneko Lurralde Lankidetzako Europako Taldea (LLET) abian jartzeko ekintzak ere barne hartzen ditu.
