Nafarroa da 2024an BPGaren gaineko I+Gko inbertsio handiena egin zuen erkidegoa. Foru Komunitateak % 40 inguruko gastu-igoera izan du 2023arekin alderatuta, eta, BPGaren % 2,34rekin, Espainiako ikerketa-ahaleginaren buru izatera igaro da
Nafarroak Ikerketa eta Garapeneko (I+G) jardueretan egindako inbertsioa bultzatu zuen iaz, eta, hala, % 2,34koa izan zen BPGaren gaineko gastu-ehunekoa. Zifra horrek estatuko sailkapeneko lehen postuan jartzen du, Euskal Autonomia Erkidegoaren (% 2,30), Madrilen (% 2,18) eta Kataluniaren (% 1,82) gainetik, gaur goizean Estatistikako Institutu Nazionalak (INE) I+Gko jarduerei buruz egindako urteko azterketan argitaratutako datuen arabera.
Lidergo hori 2024an I+Gko gastuan izandako hazkunde handiak azaltzen du, % 39,5eko hazkundea izan baitzuen 2023arekin alderatuta. Eta autonomia-erkidegoen artean izandako handiena da, eta estatuko batez bestekoa (% 6,9) baino askoz handiagoa. Guztira, Foru Komunitateak 623,1 milioi euro inbertitu zituen iaz ikerketan.
Europako Batzordearen abalarekin:
Datu horiek guztiek Nafarroak berrikuntzaren arloan azken urteotan egin duen lana berresten dute. Uda honetan, hain zuzen ere, Europako Batzordeak Nafarroa berrikuntzako bikaintasun-gune (pockets of excellence) deritzen Europako 11 eskualdeen artean sartu zuen, eta estatuko eta Europako batez bestekoak baino puntuazio handiagoa lortu zuen.
Horrez gain, txosten horrek islatu zuen Foru Komunitatearen berrikuntza-indizeak % 3,34 egin duela gora 2023tik. Horrek hazkunde positiboko joera finkatzen du, ikuspegi zabalago batetik begiratuta; izan ere, 2021etik % 11,21eko hobekuntza metatua du, azterlan horren beraren arabera.
