Europako Batzordearen Ikerketa Zentro Bateratuaren (JRC) txosten berri bat argitaratu da, «Digitalizazioaren egoera EBko nekazaritzan: nekazaritza-inkestetatik eratorritako ikuspuntuak» izenekoa. Txosten horrek teknologiak Europako nekazaritza nola aldatu duen azaltzen du.
Azterlanak panorama pozgarria erakusten du. Inkesta egin zitzaien nekazarien artean, % 93k adierazi zuen gutxienez informatika- edo software-tresna bat erabiltzen zuela, % 79k laborantzarako teknologia espezifiko bat ezarri zuen gutxienez, eta % 83k abeltzaintzarako tresna espezifiko bat erabili zuen gutxienez. Nekazari gehienak ere optimistak dira digitalizazioaren inpaktuari dagokionez: % 76k etekin ekonomikoak sortzea espero du, % 72k ingurumen-onurak aurreikusten ditu eta % 67k emaitza sozial positiboak espero ditu.
Arduradun politikoei, kudeatzaileei eta ikertzaileei laguntzeko, azterlanak panel interaktibo bat barne hartzen du. Tresna horrek datuak bistaratzen ditu eta funtsezko joerak nabarmentzen ditu, eta horrek ekintzak behar dituzten arloak identifikatzen laguntzen du.
Aurrerapenak aurrerapen, txostenak azpimarratzen du oraindik ere ustiatu gabeko potentzial handia dagoela. Datuen digitalizazioa eta elkarreragingarritasuna hobetzea ezinbestekotzat jotzen da nekazariendako eta nekazaritzako langileendako karga administratiboak murrizteko.
