António Costa Kontseilu Europarreko lehendakariak eta Ursula von der Leyen Europako Batzordeko lehendakariak, EB ordezkatuz, bilera bana egin dute Txinako Xi Jinping lehendakariarekin eta Li Qiang lehen ministroarekin. Kaja Kallas Batasuneko atzerriko gaietarako eta segurtasun-politikarako goi-ordezkariak ere parte hartu du bileretan.
Goi-bileran, EBren eta Txinaren arteko aldebiko harremanen hasieraren 50. urteurrena ospatu da, eta aukera bat izan da aldebiko harremanari buruz zentzu guztietan eztabaidatzeko eta zenbait gai geopolitiko jorratzeko, hala nola Errusiak Ukrainaren aurka egindako eraso-gerra.
EBk berretsi du Txinarekiko lankidetza sakondu nahi duela eta kooperazioa bultzatu nahi duela, munduko erronka komunei heltzeko. Testuinguru horretan, adostu dute klima-aldaketari buruzko adierazpen bateratu bat igortzea prentsara.
EBk azpimarratu duenez, lankidetza sakonagoak merkataritza-harreman orekatuagoa ekarri behar du, bi aldeentzat onuragarriagoa, eta ekitatean eta elkarrekikotasunean oinarritua.
EBko eta Txinako buruek berretsi dute konpromisoa dutela arauetan oinarritutako nazioarteko ordena defendatzeko eta multilateralismoa babesteko lankidetzan aritzeko.
EB eta Txina merkataritza-bazkide garrantzitsuak dira. 2024an, aldebiko merkataritzak 730.000 milioi euroko balioa izan zuen. Hala ere, gaur egungo merkataritza-harremanak oraindik ere oso desorekatuak dira, eta salgaien merkataritza-defizita 305.000 milioi eurokoa da. EBk adierazi du kezkatuta dagoela gaur egungo distortsio sistemikoengatik eta fabrikazio-ahalmen handiegiagatik, horrek areagotu egiten baitu aukera-desberdintasuna. Era berean, EBk oroitarazi du zenbait gairi heldu behar zaiela aspalditik, merkatuan sartzeari dagokionez, eta horretan aurrera egiteko deia berretsi du. Halaber, oroitarazi du Txinak Europan egiten dituen inbertsioek mesede egiten dietela EBren epe luzerako lehiakortasunari, aurrerapen teknologikoari eta kalitatezko enplegua sortzeari.
EB oraindik ere prest dago elkarrizketa eraikitzailea izateko, konponbide negoziatuak aurkitze aldera. Hala ez den bitartean, EBk neurri proportzionatuak hartuko ditu, legediaren araberakoak, bere interes legitimoak babesteko.
EBk adierazi duenez, espero du Txinak neurri zehatzak hartzea EBko enpresak Txinako merkatuan sartu daitezen lehentasunezko sektoreetan, hala nola haragiaren, kosmetikoen eta farmazia-produktuen sektoreetan. EBk azpimarratu du Txinak bertan behera utzi behar dituela justifikatu gabeko merkataritza-defentsako kasuak eta neurriak, baita EBko brandyaren, txerri-haragiaren eta esnekien esportazioen aurkako errepresaliak ere. EBk nabarmendu duenez, lur arraroen eta iman iraunkorren esportazioen gainean Txinak egiten dituen kontrolek inpaktu negatiboa dute, eta Txinari eskatu dio murrizketa horiek bertan behera uzteko.
