EB-Japonia 30. goi bilera Tokion (Japonia) egin da, eta EB-Txina 25. goi bilera, berriz, Pekinen (Txina).
António Costa Kontseilu Europarreko presidentea eta Ursula von der Leyen Europako Batzordeko presidentea, EBren ordezkari gisa, Shigeru Ishiba Japoniako lehen ministrorekin bildu dira.
Goi bilerak aukera eman du Japoniaren eta EBren arteko lankidetza estua nabarmentzeko, gero eta garrantzitsuagoa baita egungo testuinguru geopolitiko nahasian. Goi bileran, buruzagiek eztabaidatu dute nola jarraitu EBren eta Japoniaren arteko harremanak indartzen honako arlo hauetan, besteak beste:
- Segurtasuna eta defentsa
- Ekonomia eta lehiakortasuna
- Multilateralismoaren eta arauetan oinarritutako nazioarteko ordenaren babesa
Halaber, egungo erronka geopolitikoak ere landu dira, hala nola Errusia Ukrainaren kontra egiten ari den gerra, Ekialde Ertaineko gatazkak eta Indopazifikoko eskualdeko segurtasun egoera.
Uztailaren 24an, António Costa Kontseilu Europarreko presidentea eta Ursula von der Leyen Europako Batzordeko presidentea, EBren ordezkari gisa, Xi Jinping Txinako presidentearekin eta Li Qiang lehen ministroarekin bildu dira.
EBren eta Txinaren arteko aldebiko harremanen 50. urteurrena dela eta, goi bilerak aukera eman du Txinarekin maila gorenean hitz egiteko eta EBk herrialde horrekiko harreman zuzen eta orekatuari ematen dion garrantzia azpimarratzeko.
Goi bilera aldebiko harremanen eta erronka geopolitiko globalen egoeran oinarritu da, Errusia Ukrainaren aurka egiten ari den erasoa barne.
Buruzagiek merkataritza harreman orekatuagoa, elkarrekikoagoa eta elkarrekiko onuragarriagoa bermatzeko moduak eztabaidatu dituzte, bai eta interes komuneko arloak ere, hala nola klima aldaketa, biodibertsitatea eta trantsizio ekologikoaren aurrerapena.
Era berean, EBk defendatu du beharrezkoa dela multilateralismoa eta arauetan oinarritutako nazioarteko ordena babestea.
