Europako Batzordeak zenbait neurri proposatu ditu Europako mahastizaintzaren eta ardogintzaren sektoreak lehiakorra eta erresilientea izaten jarraituko duela eta datozen hamarkadetan ezinbesteko indar ekonomikoa izanen dela bermatzeko.
Sektoreak hainbat erronkari egin behar die aurre, hala nola kontsumitzaileen joera aldakorrei, klima-aldaketari eta merkatuaren ziurgabetasunei.
Batzordearen proposamenak neurri espezifikoak jasotzen ditu sektoreari bere ekoizpen potentziala kudeatzen laguntzeko, kontsumitzaileen lehentasunen bilakaerara egokitzeko eta merkatuaren aukera berriak aprobetxatzeko. Neurri horiek lagungarriak izanen dira, halaber, mahastizaintza eta ardogintzako industriako enplegua nagusi den landa-eremu askoren bizitasuna mantentzeko eta EBko mahastizaintza eta ardogintzako sektorearen garrantzi soziala babesteko.
EBko mahastizaintza eta ardogintzako sektorea funtsezko oinarria da Europako kultura eta ekonomia ehunean. Munduko ardo ekoizpenaren % 60 eta munduko ardo esportazioen balioaren % 60 da, eta funtsezko eginkizuna betetzen du landa ekonomietan, Europako tradizioei, gastronomiari eta turismoari estu lotuta. EBko mahastizaintza eta ardogintzako politikak arrakasta handia izan du EBko ardoen kalitatea babesteko eta sustatzeko, baina etengabeko aldaketa demografikoek, kontsumo ereduen bilakaerak, erronka klimatikoek eta merkatuko ziurgabetasunak presio handia egiten diote sektoreari.
Erronka horiei aurre egiteko, Mahastizaintza eta Ardogintza Politikari buruzko Goi Mailako Taldea sortu zen, sektorearen beharrak eztabaidatzeko eta irtenbideak proposatzeko sektorearekin eta estatu kideekin batera. Europako Parlamentuko Nekazaritza eta Landa Garapeneko Batzordearen 2025eko otsailaren 11ko bileran, Christophe Hansen komisarioak ardoari buruzko hurrengo proposamenaren berri eman zuen. Proposamen hori Goi Mailako Taldearen gomendioak lege-neurri zehatz bilakatzeko diseinatu zen. Gaurko proposamenak konpromiso hori bete dela esan nahi du.
Behin ezarrita, esparru berriak azkar ekitea ahalbidetuko du, ekoizleentzako aukera gehiago bermatuz eta, aldi berean, Batasun osoan mahastizaintza eta ardogintzako sektorearen etorkizun lehiakorra bermatuz.
