Batzordeak herrialdeka argitaratu du EBko hamar estatu kiderentzako Konbergentzia Sozialaren Markoaren bigarren fasearen azterketa, EBko gobernantza ekonomikoko arau berriekin bat etorriz. Txosten hori Europako Seihilekoaren parte da.
Zer da Konbergentzia Sozialaren Markoa?
Konbergentzia Sozialaren Markoak estatu kideen goranzko konbergentzia sozialerako arriskuak eta erronkak ebaluatzeko balio du, justizia soziala zaintzeko eta kohesionatutako gizartea eta hazkunde jasangarria eta inklusiboa sortuko duen ekonomia bermatzeko.
Markoak politika arlo hauek hartzen ditu:
- Lan merkatuak
- Hezkuntza eta trebetasunak
- Gizarte politikak
Zer herrialde ikertu dira azterketan?
Analisi hau hamar estatu kideri buruzkoa da; hain zuzen ere, 2025eko Enpleguari buruzko Txosten Bateratuan goranzko konbergentzia sozialerako arrisku potentzialak dituzten hamar estatu horiei buruzkoa.
Zehazki, herrialde hauek dira: Bulgaria, Estonia, Grezia, Espainia, Kroazia, Italia, Lituania, Luxenburgo, Hungaria eta Errumania.
Funtsezko aurkikuntzak
Oro har, azterketa gehigarriak hau adierazten du hamar estatu kide horientzat:
- Gizarteratzearen arloak arreta politiko berezia eskatzen du, batez ere diru sarreren desberdintasunari eta hamar herrialde horietan pobrezia edo gizarte bazterketa pairatzen duen biztanleriaren proportzioari dagokienez.
- Hezkuntzaren eta gaitasunen eremuan, oraindik ere alderdi kritikoak identifikatzen dira herrialdeen erdietan, bai helduek ikaskuntzan duten parte hartzeari dagokionez, bai gutxienez oinarrizko gaitasun digitalak dituzten pertsonen proportzioari dagokionez; eta hiru herrialdetan hezkuntza eta formazioa behar baino lehen uzteari dagokionez. Azterketak erakusten duenez, lan merkatuaren premiekin bat datozen gaitasunak eskuratzeko, bai gazteentzat, bai helduentzat, arreta handiz eta etengabe aztertu behar dira etorkizuneko politikak.
- Lan merkatuak oro har sendo mantentzen badira ere, sei herrialdetan desgaitasunak dituzten pertsonentzako erronkak identifikatzen dira enplegu arrakalari dagokionez, eta lautan langabezia tasari dagokionez. Azterketak erakusten du beharrezkoa dela oraindik lan merkatuan azpiordezkatuta dauden taldeak modu eraginkorragoan integratzea.
Prozesuaren hurrengo urratsak
Azterketa horren ondorioak estatu kideekin eztabaidatuko dira Enplegu Batzordean eta Gizarte Babeserako Batzordean, 2025eko Europako Seihilekoko Udaberriko Paketea onartu aurretik.
