Europako Parlamentuaren Eurobarometroaren 2025eko neguko inkestak EBko kide izatearen onarpen maila historikoak erakusten ditu, bakeari eta segurtasunari lotutakoak
Europarren % 66k nahi dute EBk zeregin garrantzitsuagoa izatea, krisi globalen eta segurtasun arriskuen aurrean babesteko
Defentsa eta segurtasuna (% 36) eta lehiakortasuna (% 32) dira lehentasun politiko nagusiak.
Hamar europarretik bederatzik (% 89) diote estatu kideek batasun handiagoz jardun beharko luketela erronka globalen aurrean
% 74k uste dute bere herrialdeak onura ateratzen diola EBko kide izateari. % 62k paper garrantzitsuagoa eskatzen diote Europako Parlamentuari
Roberta Metsola Europako Parlamentuko presidenteak honako hau adierazi zuen: «Europarren bi herenek nahi dute EBk zeregin garrantzitsuagoa izatea haiek babesteko orduan. Ekintzarako dei argia da, eta horri erantzunen diogu. Europak indartsuagoa izan behar du herritarrak seguruago senti daitezen. Europako Parlamentuak bermatuko du aurkeztutako proposamen bakoitza Europak aurrean duen mehatxu maila larriari aurre egiteko bezain ausarta eta anbizio handikoa dela. Europak aurrerapauso bat eman behar du gaur, edo bihar baztertuta geratzeko arriskua du».
EBko herritarren % 66k nahi dute Batasunak zeregin garrantzitsuagoa izatea krisi globalen eta segurtasun arriskuen aurrean haiek babesteko. Iritzi hori bereziki sendoa da inkestatu gazteenen artean. Estatu kideei dagokienez, aldea dago EBri zeregin handiagoa emateko babesaren inguruan: % 87 Suedian, % 47 Errumanian eta % 44 Polonian.
EBko herritarren ia hiru laurdenek (% 74) uste dute beren herrialdeak onura atera diola EBko kide izateari. Hori da Eurobarometroaren inkesta batean inoiz erregistratu ez den emaitzarik handiena, galdera hau lehen aldiz 1983an egin zenetik. Egungo testuinguruan, inkestatuek aipatzen dute EBk bakeari eta segurtasunari egiten dion ekarpena (% 35) dela kide izatea onuragarritzat jotzeko arrazoi nagusia.
Gainera, EBko herritarren artean adostasun zabala dago: estatu kideek batasun handiagoz jardun beharko lukete egungo erronka globalei aurre egiteko (% 89), eta Batasunak baliabide gehiago behar ditu etorkizuneko erronkei aurre egiteko (% 76).
Espainiaren kasuan, herritarren % 72k nahi dute EBk zeregin nabarmenagoa izatea krisi globalen eta segurtasun krisien aurrean; ehuneko hori Batasuneko batezbestekoa baino sei puntu handiagoa da. % 76k uste dute Espainiak onura atera diola EBko kide izateari; ehuneko hori Batasuneko batezbestekoa baino zertxobait handiagoa da (% 74).
Bakeari eta segurtasunari egindako ekarpena Batasuneko kide izatea onuragarritzat jotzeko arrazoi nagusitzat hartzen da EB osoan, baina espainiarren ustez hazkunde ekonomikoa da onura nagusia (% 39). Gehien baloratzen den bigarren onura da lan aukeren sorrera (% 27), eta hirugarrena, berriz, bakea eta segurtasuna (% 26).
Gainera, espainiar gehienek (% 93) uste dute estatu kideek batasun handiagoz jardun beharko luketela egungo erronka globalei aurre egiteko. % 85ek uste dute Batasunak baliabide gehiago behar dituela etorkizuneko erronkei aurre egiteko.
