Europako Batzordea neurriak hartzen ari da EBko hainbat estatu kideren aurka, estatu horiek ez baitizkiote Batzordeari jakinarazi beren legeria nazionaletara EBren zuzentarauen transposizioa egiteko hartu dituzten neurriak. Zuzentarau horien transposizioa egiteko epea duela gutxi amaitu da. Batzordeak epatze gutun bat igorri die estatu kide horiei, eta bi hilabete eman dizkie erantzuteko eta zuzentarauen transposizioa osatzeko. Hala egiten ez badute, Batzordeak abisu irmoago bat ematen ahalko du, irizpen arrazoitu gisa ezagutzen dena. Estatu kide horiek ez dituzte erabat txertatu EBko energiari, osasunari, finantza egonkortasunari eta garraioari buruzko bost zuzentarau. Batzordeak eskatu die berehalako neurriak har ditzatela beren legeria EBren betekizunetara egokitzeko. Behean, Espainiari zuzenean dagozkion arau hausteen berri eman dugu.
Espainia bada 2024/1711 (EB) Zuzentarauaren xedapenen transposizioa zuzenbide nazionalera erabat egin ez duten EBko 26 estatu kideetako bat. Horrenbestez, Batzordeak epatze gutunak igorri dizkie estatu kide horiei guztiei. Legeria aplikatzea funtsezkoa da bermatzeko Europako kontsumitzaileek (familiak zein enpresak) energia berriztagarrien ekoizpen kostu merkeagoak agertzen dituzten energia kostuak dituztela eta prezio aurreikusgarriagoak izaten ahal dituztela. Elektrizitatearen merkatuaren konfigurazio eraberrituak ere kontsumitzaileak hobeki babestea ahalbidetzen du, bai kontratuak sinatzeko orduan aukera gehiago izateari dagokionez, bai deskonexioari dagokionez.
Zuzentarauak arduradun politikoen ekintzetarako epeak jasotzen zituen –transposizio epe osoa 2025eko urtarrilaren 17an amaitzen zen beranduenik–, bai eta xedapen espezifikoak ere, hala nola hornitzailearen aukera askea eta energiaren erabilera partekatua, beranduenik 2026ko uztailaren 17an aurkeztu behar direnak.
Espainiako Gobernuari gaia formalki jakinarazi zaio, eta bi hilabeteko epea eman zaio erantzuteko, transposizioa osatzeko eta Batzordeari neurriak jakinarazteko. Erantzun egokirik eman ezean, Batzordeak irizpen arrazoitua ematea erabakitzen ahalko luke.
