Batzordeak, lehen aldiz, 47 proiektu estrategikoren zerrenda bat onetsi du lehengaien barne gaitasun estrategikoak bultzatzeko, eta horrek, aldi berean, lehengaien Europako balio katea indartuko du eta hornidura iturriak dibertsifikatuko ditu. Proiektu estrategiko berriek mugarri garrantzitsua ezartzen dute Oinarrizko Lehengaien Araudiaren aplikazioan. Erregelamendu horren helburua da bermatzea Europan lehengai estrategikoen arloan egiten diren erauzketak, prozesaketak eta birziklatzeak EBren eskariaren % 10, % 40 eta % 25 estaltzen dutela, hurrenez hurren, beranduenik ere 2030ean. Europari helburu horiek betetzen laguntzen diotenez, proiektu estrategiko berriek ekarpen nabarmena egiten diote gure trantsizio berde eta digitalari, eta, aldi berean, Europako defentsaren industria eta industria aeroespazialak babesten dituzte.
47 proiektu estrategiko berriak Europar Batasuneko hamahiru estatu kidetan daude kokatuta: Belgika, Txekiar Errepublika, Alemania, Estonia, Grezia, Espainia, Frantzia, Italia, Polonia, Portugal, Errumania, Finlandia eta Suedia. Proiektu horiek hautatu dira EBko lehengai estrategikoen hornidura seguruari laguntzen diotelako, ingurumen, gizarte eta gobernantza irizpideak betetzen dituztelako eta teknikoki bideragarriak direlako. Gainera, hautatutako proiektuek erakutsi dute mugaz haraindiko onura nabarmenak dituztela Batasunarendako.
