Batzordeak eta goi ordezkariak Europako Defentsari buruzko Liburu Zuria eta Prestaketa 2030 plana aurkeztu dituzte. Halaber, Batzordeak, ReArm Europe-Prestaketa 2030 planaren zati gisa, defentsa neurrien asmo handiko sorta bat aurkeztu du, EBko estatu kideei finantza tresnak ematen dizkiena defentsa gaitasunetan inbertsio handiagoa egin dezaten bultzatzeko.
ReArm Europe-Prestaketa 2030 planak Europa osoko defentsa gaitasunak indartzen ditu finantza tresna berrien bidez; era berean, Liburu Zuriak defentsaren arloko planteamendu berri baten zirriborroa egiten du eta inbertsio beharrak identifikatzen ditu.
Ursula von der Leyen Europako Batzordeko presidenteak honako hau adierazi du: «Amaitu da bakearen dibidenduen aroa. Dagoeneko ezin dugu ziurtzat jo lehen babesten gintuen segurtasun arkitektura. Europa bere ahaleginak areagotzeko prest dago. Defentsan inbertitu behar dugu, gure gaitasunak indartu eta segurtasunaren arloko ikuspegi proaktiboa hartu. Neurri irmoak hartzen ari gara Prestaketa 2030 ibilbide orria aurkeztearekin batera, bai defentsa gastua areagotzeko, bai defentsarako Europako industria gaitasunetan inbertsio handiak egiteko. Europan ekoitzitako produktu gehiago erosi behar ditugu, horrek berekin baitakar Europako defentsaren oinarri industrial eta teknologikoa indartzea, eta berrikuntza sustatu behar dugu, bai eta EB mailako defentsa ekipoen merkatu bat sortu ere».
Neurri horien helburua da Ukrainari laguntzeko epe laburreko premiari erantzutea; era berean, Europaren segurtasuna eta defentsa bultzatzeko epe luzeko premia larriari ere heltzen diote neurriek.
