Europako Batzordeak Aurrezki eta Inbertsioen Batasunaren (AIB) estrategia onetsi du. Ekimen hori funtsezkoa da, EBko finantza sistemak aurrezkia inbertsio produktiboetara bideratzeko duen modua hobetzeko. Haren helburua da EBko herritarrei kapital merkatuetarako sarbide zabalagoa eskaintzea eta enpresei, berriz, finantzaketa aukera hobeak. Horrek herritarren ondarea bultzatzen ahal du eta, aldi berean, EBren hazkunde ekonomikoa eta lehiakortasuna suspertzen.
AIB zeharkako bideratzaile bat da, finantzaketa ekosistema bat sortuko duena EBren helburu estrategikoetako inbertsioen mesedetan. “Lehiakortasunaren iparrorratzean” nabarmentzen den bezala, Europak egungo erronkei (adibidez, klima aldaketa, mutazio teknologiko azkarrak eta dinamika geopolitiko berriak) aurre egiteko duen gaitasunak inbertsio handiak eskatzen ditu. Draghi txostenaren arabera, hemendik 2030era 750.000 eta 800.000 milioi euro arteko zenbateko gehigarria izanen du. Horrez gain, defentsa premiak areagotu beharrak ere ondorioak izanen ditu. Inbertsio gehigarri horietako asko enpresa txiki eta ertainekin (ETE) eta enpresa berritzaileekin lotuta daude, zeinak ezin baitira soilik banku finantzaketaren mende egon. Kapital merkatu integratuak sustatuz eta banku sistema integratuz, AIBk eraginkortasunez konektatzen ahal ditu aurrezki eta inbertsio beharrak.
EBk baditu talentudun eskulana, enpresa berritzaileak eta familien aurrezki erreserba zabala, 10.000 milioi euro ingurukoa dena banku gordailuetan. Gordailu horiek seguruak dira eta erraz eskuratzen dira, baina kapital merkatuetako inbertsioek baino errentagarritasun txikiagoa eskaini ohi dute. AIBk Europako herritarren ongizateari laguntzen ahal die; izan ere, etekin hobea lortzeko aukera eta bidea eskaintzen die, aurrezkiek kapital merkatuetan fruitu eman dezaten.
Aldi berean, kapital merkatuetan inbertsio gehiago egiteak euskarri ematen dio ekonomia errealari, inbertsio horiek Europa osoko enpresak haztea eta aurrera egitea errazten baitute. Horrela, Europako langileendako soldata handiagoak dituzten lanpostu hobeak sortzen ahal dira, eta inbertsioa eta hazkundea sustatzen ahal dira sektore ekonomiko guztietan, bereziki EBk estrategikoki garrantzitsutzat jotzen dituen eremuetan, hala nola berrikuntzan, deskarbonizazioan eta segurtasunean.
