Otsailaren 4an, asteartearekin, EBko Barne-merkatuko, Industriako eta Merkataritzako ministroen bilera informal bat egin zen Varsovian, eta gai nagusi hau eztabaidatu zen: nola bermatu merkataritza- eta industria-politiken arteko koherentzia, EBren lehiakortasun globala indartzeko, nazioarteko ingurune ezegonkor batean.
Poloniako presidentetza izan da lehena Kontseiluaren bi erakunderen bilera batera antolatzen: Lehiakortasun Kontseilua eta Kanpo Arazoetako Kontseilua, merkataritza-formatuan. Europaren lehiakortasunak egun dituen erronkei aurre egiteko, beharrezkoa da politiken arteko sinergiak lortzea eta administrazio-zuloak haustea.
Ministroek erabaki dute merkataritza-politikako tresnak gehiago egokitu behar direla industria-politikako helburuetara, Europako enpresen lehiakortasun globala indartzeko.
Halaber, azpimarratu zuten beharrezkoa dela ekimen berriak abiaraztea Merkatu Bakarraren sendotasuna bultzatzeko eta baldintza-berdintasuna bermatzeko, batez ere hirugarren herrialdeetako praktika desleialei erantzuteko.
Eztabaidan, nabarmendu zen zein garrantzitsua den tradizionalki indartsuak izan diren sektoreei laguntzea, hala nola sektore kimikoari, siderurgikoari eta automobilgintzari. Izan ere, haien egoerak eragin zuzena du lehiakortasun orokorrean eta Europako merkatuan funtsezko baliabideen eskasiari aurre egiteko gaitasunean.
Europako Batzordeak Lehiakortasunaren Iparrorratza argitaratu ondoren, lehen aldiz bildu ziren Ekonomiako ministroak, eta eztabaida politikoaren ardatza izan zen industria-politikak eta merkataritza-politikak izan behar duten koherentzia. Lehiakortasunaren Iparrorratzak ezartzen du zer norabide estrategiko hartu behar duen Europako politika ekonomikoak hurrengo bost urteetan, eta Europako enpresen lehiakortasun globala indartzeko ekimenak jasotzen ditu.
Agiri horretan iragarritako funtsezko ekimen bat da Industria Garbiaren aldeko Ituna, eta ziurrenik otsailaren amaieran aurkeztuko da.
