Lorenzo Natali sariaren aurtengo irabazlea iragarri zuten atzo, Bruselako Résidence Palacen egindako ekitaldi batean. EBk mundu osoko kazetariei laguntzeko duen konpromisoaren erakusgarri da saria.
Aurten, mundu osoko 1.200 kazetarik baino gehiagok aurkeztu dituzte hautagaitzak. Lau kazetaritza-eskolak —Universidade Catôlica Portuguesa (Portugal), Nafarroako Unibertsitatea (Espainia), Université Saint-Joseph de Beyrouth (Libano) eta Vesalius College (Belgika)— aurrehautaketa bat egin zuten, eta, ondotik, kazetaritzaren munduko nazioarteko izen handiko bost aditu hauek osatutako epaimahai handiak hautatu zituen irabazleak: Inday Espina-Varona, Stefanie Glinski, Ntibinyane Alvin Ntibinyane, Delia Rodríguez eta Artur Romeu.
Hauek dira 2024ko edizioaren irabazleak: Kazetari emergente hoberenaren kategorian, Jamaima Afridik jaso zuen saria, errefuxiatu afganiarrek (bereziki, talibanak boterera itzultzeak erasandako emakume afganiarrek) Pakistanen dituzten zailtasunei buruzko ikerketa-lanagatik. Mathilde Cusin, Manon de Couët eta Martin Boudot kazetari frantsesek ikerkuntza-kazetaritzako saria irabazi zuten, «Armes, l’héritage toxique» erreportajeagatik. Gabriela Ramírez eta Tina Xu kazetariek irabazi zuten kazetaritza sakoneko saria, «Viudas por las fronteras de Europa» artikuluagatik. Fotokazetaritza izeneko sari berezian, Bienvenido Velasco aintzatetsi zuten, «Las redes sociales, el engaño que anima a miles de migrantes por la selva del Darién» lanagatik.
Sariak emateko ekitaldiak aukera eman zuen komunikabide independenteek aurrez aurre dituzten erronka nagusiak eztabaidatzeko eta mundu osoko komunikabideen aldeko EBren ekintza aurkezteko.
