CEIN eta SODENA sozietate publikoek Bridge to AInnovation for the Entrepreneurship Ecosystem (BAI) proiektuaren hasierako bileran parte hartu dute.
Industria eta Enpresen Trantsizio Ekologiko eta Digitalerako Departamentuak, Nafarroako Enpresa eta Berrikuntzaren Europako Zentroa (CEIN) eta Nafarroako Garapen Sozietatea (SODENA) sozietate publikoen bidez, ‘Bridge to AInnovation for the Entrepreneurship Ecosystem’ (BAI) proiektu europarrean parte hartuko du. Haren bazkideek duela gutxi egin dute hasierako lan-saioa.
Ekimen honen helburua da eskualdeko ekintzailetza-ekosistema parte-hartzaileentzako laguntza-sistema aurreratu bat eratzea, teknologia digital disruptiboak integratuko dituena, eta, horrela, ekintzaileei eta startupei zuzendutako zerbitzu publikoen eraginkortasuna, segurtasuna eta irisgarritasuna hobetuko dituena.
BAI proiektuaren onuradun dira, Nafarroako Gobernuaz gain, Madrilgo Erkidegoa (Ekonomia, Ogasun eta Enplegu Kontseilaritza), Andaluziako Junta (Unibertsitate, Ikerketa eta Berrikuntza Kontseilaritza), Extremadurako Junta (Ekonomia, Enplegu eta Eraldaketa Digitaleko Kontseilaritza) eta Alemaniako Ekonomia eta Klima Ekintzako Ministerio Federala.
Esparru horretan, 2025eko abendura arte, zerbitzu publikoetan teknologia eta metodologia berritzaileen erabilgarritasuna ikertu eta ebaluatuko da, bai eta azterketa eta ikaskuntza komuneko kasuen analisia ere. Gainera, bost eskualde-plan garatuko dira teknologia ezartzeko, eta dibulgazio-tailer bat emaitzak aurkezteko.
BAI proiektua Europar Batasuneko REFORM Zuzendaritza Nagusiak finantzatzen du, Laguntza Teknikorako Tresnaren bidez (TSI 2024), eta Eraldaketa eta Erresilientzia Berreskuratzeko Programak planteatzen dituen erreformei eta inbertsioei lotuta dago.
