Nafarroako Gobernuko Ekonomia Sozialeko eta Laneko Zuzendaritza Nagusiak ekonomia sozialari buruzko RESEES proiektuaren lankidetza bilera bat antolatu du
Ekonomia Sozialak (ES) 2,8 milioi enpresa eta erakunde ordezkatzen ditu Europan, 13,6 milioi langile dituztenak, hau da, EBko eskulanaren % 6,3 inguru. Hazkunde integratzailea, ingurumen jasangarritasuna eta garapen komunitarioa sustatzean, ESk enplegu erresistenteagoa eta ekitatiboagoa lortzen laguntzen du Europako eskualdeetan.
Nafarroako Gobernuak RESEES izeneko Interreg Europe proiektuan parte hartzen du, Italiako, Frantziako, Finlandiako, Esloveniako eta Belgikako erakunde bazkideekin batera, baita Murtziarekin (Espainia) ere. Europako sei eskualde horiek tinko integratu dute EK beren RIS3 eremu politikoan, eskualdeko hazkunde ekonomiko jasangarriaren eragile gisa.
RESEESen helburu orokorra da eskualdeko garapen politiken aplikazioa eta alderdi interesdunen gaikuntza hobetzea eskualdeko ESko ekosistemen eremuan.
Haren helburu nagusia da lankidetza eta sareen sorrera indartzea, baita lankidetza ekonomian interesa duten alderdien kualifikazioak hobetzea ere, Europan kalitatezko enplegu jasangarri eta integratzailerako bide gisa.
Proiektu hori bat dator Ekonomia Sozialeko Europako Plana eta Gaitasunen Europako Agenda eskualde mailan aplikatzearekin.
Urriaren 1ean eta 2an, proiektuko bazkide diren erakundeen topaketa bat eginen da Nafarroan, eta arlo horretako lehen jardunbide egokiak landuko dira bertan. Bi egun horietan lau gairi buruz hitz eginen da:
- Ekonomia sozialaren zereginari buruzko sustapena eta sentsibilizazioa
- Gaitasunen garapena eta gaikuntza
- Sareko lana eta lankidetza
- Ekonomia sozialaren inguruko politika publikoen ebaluazioa, neurketa eta jarraipena
