Gaur argitaratutako Eurobarometroaren inkesta berri baten arabera, europarrek demokrazia, giza eskubideak eta zuzenbide-estatua errespetatzea (% 38) eta botere ekonomikoa, industriala eta komertziala (% 34) jotzen dituzte EBren indargune nagusitzat, eta, ondoren, EBko estatu kideen arteko harreman onak eta elkartasuna (% 28).
Inkestatuek maizago aipatzen dituzte EBk ingurumena eta klima-aldaketa (% 33) eta migrazio irregularra (% 33) lehentasunez jorratu behar dituen eremuak, ondoren segurtasuna eta defentsa (% 29) eta Ukrainako gerra (% 25).
Bestalde, Ukrainako gerra da EBk aurre egin beharreko erronketan lehena, inkestatuen % 50en arabera. Migrazio irregularra eta ingurumen-gaiak eta klima-aldaketa bigarren eta hirugarren postuan daude, hurrenez hurren, % 41 eta % 35ekin.
EBk munduko beste herrialde batzuekin alderatuta hobekien ordezkatzen dituen balioei buruz galdetzen zaienean, europarrek zalantzarik gabe adierazten dute oinarrizko eskubide eta balioen errespetua eta adierazpen-askatasuna (% 53 bi kasuetan).
Baikortasun orokorra hurrengo urteei buruz
Europarren %58k EBren etorkizunari buruz baikor izateko joera du, eta %37k, berriz, ezkor izateko joera.
%55ek dio oso ziur edo ziur dagoela EBko demokraziaren sendotasunaz datozen bost urteetan; %41ek, berriz, zalantza batzuk edo asko ditu horri buruz.
Bestalde, EBko herritarren %64 kezkatuta dago EBk datozen bost urteetan izango duen segurtasunarekin.
Azkenik, %51k konfiantza du EBko ekonomiaren errendimenduan datozen bost urteetan, eta %45 eszeptikoagoa da.
Testuingurua
Flash 550 Eurobarometroa 2024ko ekainaren 25etik uztailaren 2ra bitartean egin zen, hogeita zazpi estatu kideetan. EBko 25 658 herritar elkarrizketatu ziren linean.
