Indarrean sartu dira emakumeen kontrako indarkeriaren eta etxeko indarkeriaren aurkako borrokari buruzko EBko lehen arauak. Kalkuluen arabera, EBko 228 milioi emakumeak kontuan hartuta, emakumeen kontrako indarkeriak eta etxeko indarkeriak hirutik bati eragiten diote. Europar Batasun osoan emakumeen kontrako indarkeria mota jakin batzuk delitu gisa tipifikatzean –online gertatzen direnak barne–, eta biktimek justiziarako, babeserako eta laguntzarako baliabideak eskurago izatean, zuzentarauaren xedea da emakumeen eta gizonen arteko tratu berdintasunaren eta diskriminaziorik ezaren oinarrizko eskubideak bermatzea.
Arau berriak erabakigarriak dira genero indarkeriaren aurka, eta debekatu egiten dituzte emakumeen genitalen mutilazioa, ezkontza behartua eta ziberindarkeriaren modu orokorrenak, hala nola irudi intimoak baimenik gabe zabaltzea (ultrafaltsutzeak barne), ziberzelatatzea eta ziberjazarpena (baita ziberexhibizionismoa ere). Ziberindarkeriari lehenbailehen heldu behar zaio, online indarkeriaren hedapen esponentziala eta inpaktu dramatikoa direla eta. EBko arau berriek ziberindarkeriaren biktimei lagunduko diete, ekintza horiek oraindik tipifikatu ez dituzten estatu kideetan.
