Batzordeak Osasunerako Europar Batasunari buruzko Komunikazio bat onetsi du, EBren osasun politikan azken lau urteotan EBko eta mundu osoko herritarren mesedetan egindako aurrerapenak agerian uzteko.
Agintaldiaren hasieran, mende oso batean izandako pandemia handiena sortu zen. Pandemia horrek giza sufrimendua eragin zuen mundu osoan, eta osasun publikoko sistemak kolokan jarri zituen. Hala ere, COVID-19aren pandemiak erakutsi zuen noraino iristen ahal diren EBren elkartasuna, lankidetza eta ekintza erabakigarria. EBko Txertoen Estrategiari esker, EBko herritar guztiek COVID-19aren aurkako txertoak eskuratu ahal izan zituzten, data berberetan eta baldintza berberetan, eta, horri esker, birusaren hedapena neurri handian geldiarazi zen eta milioika bizitza salbatu ziren. Halaber, EBko COVID ziurtagiri digitalari esker, ekonomiak eta gizarteak berriro ireki ziren modu seguruan, eta SURE tresnak 31 milioi langileri baino gehiagori lagundu zien eragin ekonomikoa gainditzen. Pandemiek mugarik ez dutenez, gure lankidetza eta elkartasuna mundu osora zabaldu ziren. Europa Taldearen ikuspegiaren bidez, EB izan zen txerto emaile handiena, COVAX mekanismoaren bidez, eta ia 54.000 milioi euro eman zituen, herrialde elkartuei larrialdiko laguntza emateko.
