Europako Parlamentuko Eurobarometroaren ekaineko hauteskundeen aurreko azken inkestak agerian uzten du herritarrak kontzientziatuta eta kezkatuta daudela egungo testuinguru geopolitikoari buruz.
Gaur argitaratutako Eurobarometroak goranzko joera positiboa erakusten du hauteskunde-adierazle nagusietan, ekainaren 6tik 9ra EBko herritarrek botoa emateko aste gutxi falta direlarik. Hauteskundeekiko interesa, hauteskunde dataren ezagutza eta botoa emateko asmoa handitu egin dira 2023ko udazkenean egindako azken inkestatik, orduan neurtu baitziren azkenekoz. Are gehiago handitu dira 2019ko udaberrian egindako inkestarekin alderatzen badira (Europako aurreko hauteskundeak baino hiru hilabete lehenago).
Etorkizunari begira, EBko herritarren ustez, defentsa eta segurtasuna (% 37) dira EBk munduan duen posizioa indartzeko lehentasunak, eta ondoren, energia eta segurtasuna/nekazaritza gaiak (% 30). Hamar herritarretik lauk uste dute EBren paperak garrantzi handiagoa hartu duela azken urteotan; % 35ek uste du berdin mantendu dela, eta % 22k behera egin duela. Herrialdeei dagokienez, hamabost herrialdetan, inkesta erantzun duten gehienek uste dute EBk pisua irabazi duela munduan urteekin, honako portzentaje hauekin: % 67 Suedian, % 63 Portugalen eta % 60 Danimarkan. Eslovenian eta Txekian daude EBk garrantzia galdu duela usten duten herritarren portzentajerik handienak (% 32 eta % 30, hurrenez hurren).
Espainiaren kasuan, inkesta erantzun dutenen % 37k esan du EBk lehentasuna eman beharko liekeela etorkizunean hezkuntzari eta ikerketari, alde batetik, eta elikagaien segurtasunari eta nekazaritzari, bestetik. Lehentasun izan behar dute, orobat, ekintza klimatikoak, parte-hartzaileen % 27rentzat, eta lehiakortasunak, ekonomiak eta industriak, % 26rentzat. EBren eginkizunari dagokionez, espainiarren % 40k garrantzia irabazi duela uste du, % 38k berdin mantendu dela eta % 17k garrantzi txikiagoa duela.
