Uda honetatik aurrera, milaka gaztek doan bidaiatzen ahalko dute berriz ere Europan barrena, DiscoverEU programaren azken deialdiari esker. Gaur, 12:00etan (CET), jarduerez betetako Europako Gazteen Astearen esparruan, Batzordeak DiscoverEU programaren eskaeren azken txanda egin du, eta apirilaren 30ean (asteartea) bukatuko da, 12:00etan (CET).
Guztira, 35.500 bidaia bonu daude. Bat lortzeko, 2005eko uztailaren 1etik 2006ko ekainaren 30era bitartean jaiotako gazteek EBri buruzko bost galderako galdetegi bati eta beste galdera bati erantzun beharko diete EBren gazteen atarian. Aukeratuek gehienez ere 30 egunez 2024ko uztailaren 1etik 2025eko irailaren 30era bitartean Europan zehar bidaiatzeko doako tren txartel bat lortuko dute.
Europar Batasuneko gazteek ez ezik, Erasmus+ programako kide diren herrialdetakoek ere eskatzen ahalko dute; besteak beste, Islandiakoek, Liechtensteinekoek, Ipar Mazedoniakoek, Norvegiakoek, Serbiakoek eta Turkiakoek. Txartelen titularrek bi aukera dituzte, edo beren ibilbideak planifikatzea, edo jada daudenetan inspiratzea. Esate baterako, iaz ezagutarazi zen ibilbide bat egin dezakete; Europar Batasuna, Europar Bauhaus berriaren printzipioekin bat, «eder, jasangarri eta inklusibo» egiten duten hiri eta tokietan zentratzen da.
Beste ibilbide bat DiscoverEU kultura ibilbidea da; 2022ko Gazteen Europako Urteko ekimen bat da, eta kultura alderdiak konbinatzen ditu, hala nola arkitektura, musika, arte ederrak, antzerkia, moda eta diseinua. Parte hartzaileek Unescoren Munduko Ondarearen Zerrendan agertzen diren Europako kultura hiriburuak, Europako Ondarearen Zigiluko guneak edo Hiri Irisgarriaren Saria duten lekuak bisitatzen ahalko dituzte. Horiek guztiek mugak gainditzeko ahalegina egin dute, guztiontzako irisgarriagoak izateko.
