Ollo presidenteordeak Portugalen egindako foroan parte hartu du, Nafarroak koordinatutako ekonomia zirkularreko proiektu bat Europako Batzordeak hautatu ondoren
Nafarroak Europan berrikuntza jasangarriaren arloan duen esperientzia eta lidergoa defendatu ditu, eskualde garapeneko esperientzia praktiko gisa, Europar Batasuneko beste eskualde batzuekin lankidetzan. Ana Ollo Memoria eta Bizikidetzako, Kanpo Ekintzako eta Euskarako kontseilaria eta presidenteordea Arku Atlantikoaren Batzordearen batzar nagusian izan da gaur, Sines-Alentejon (Portugal), Europako Batzordeak Nafarroa Zirkular ekimenetik sortutako proiektu bat hautatu ondoren.
Horrez gain, Ollo presidenteordeak adierazpen politiko bat babestu du, makroeskualde baten aldeko ideia indartzeko eta Europako erakundeen etorkizuneko arduradunei eskatzeko Europako ardatz atlantikoari ere arreta jar diezaiotela, arduradun horiek laster berrituko dira eta.
Jakina denez, Nafarroa aukeratu dute ECIV (European Circular Innovation Valley) proiektu europarraren partzuergoaren koordinatzaile gisa. Asmo handiko ekimen bat da, Europar Batasunean benetan konektatuta dagoen eskualdeen arteko ekosistema bat sortzeko, 27 milioi eurotik gorako finantzaketarekin. Nafarroaren kasuan, 6.428.500 euroko aurrekontua esleitu zaio, eta Europako Batzordeak % 50eko finantzaketa eman dio. Europako Berrikuntza Zirkularraren Ibarra izan da Arku Atlantikoan Nafarroaren ordezkaritzak ofizialki esku hartzeko aukeratu duen gaia. Presidenteordea izan da buru, eta Kanpo Ekintzarako zuzendari nagusi Sergio Pérezek ere parte hartu du.
Foru ordezkaritzak Arku Atlantikoko biltzarraren programaren bigarren egunean esku hartu du, Nafarroa erakunde horren parte baita. Beste eskualde batzuek ere aztertu dute, beren ikuspegi geografikoetatik, Atlantikoko berrikuntza ibar baten ikuspegia eraikitzeak lekarrena.
