Bilera Belgikako Mons hirian egin da, eta, bertan, Europaren etorkizunerako erronkak eta konponbideak aztertu dira.
Nafarroako Gobernuaren Bruselako Ordezkaritzak Erregioen eta Hirien Europako 10. Goi Bileran parte hartu du, automobilgintzaren sektorea eraldatzeari buruzko stand baten bidez. Bilera Belgikako Mons hirian egin da, martxoaren 18an eta 19an.
Goi bilera horretan, Memoria eta Bizikidetzako, Kanpo Ekintzako eta Euskarako Departamentuak parte hartu du stand horren bidez, eta Europaren etorkizunerako erronkak eta konponbideak aztertu dira, Europar Batasuneko Kontseiluaren Belgikako presidentetzapean.
Bilera horretan, ikuspegi berri bat eman da herritarrak kezkatzen dituzten gaiei buruz: demokrazia, garapen jasangarria, Europar Batasunaren etorkizuna eta haren hedapena, gizarte-, ekonomia- eta lurralde-kohesioa bermatu beharra, eta Ukrainaren aurkako gerraren ondorioei aurre egitea.
Kanpo Ekintzarako Zuzendaritza Nagusiaren Kanpo Ekintzarako 2021-2024 Planaren 1. ardatzaren (“Nafarroa Europan”) ildotik, goi bilera horretan parte hartu du, automobilgintzaren sektorearen eraldaketa jasangarri eta bidezkoaren erronkei buruzko stand baten bidez. Nafarroak esparrua partekatu du Saxoniako (Alemania) ordezkariekin, erregio hori baita Eskualdeetako Lantaldeko automobilgintzako eraldaketaren lantaldearen koordinatzailea, baita Automobilgintzako Gaitasunen aldeko Aliantzako ordezkariekin ere. Nafarroak Eskualdeetako Automobilgintzaren Aliantzako erregio buruzagia den aldetik hartu du parte, eta bisitariei luzatu dizkie Iruñean 2023ko azaroan onetsitako “Nafarroako Adierazpena” eta Kanpo Ekintzarako Zuzendaritza Nagusiak prestatutako “Navarra Automotive” liburuxka.
