Erasmus+, hezkuntzarako, prestakuntzarako, gazteriarako eta kirolerako EBren programak 26 000 proiektu inguru lagundu zituen 2022an; horrela, 73 000 erakunderi baino gehiagori lagundu zien. Ikasteko mugikortasun aukerak eskaini zizkien 1,2 milioi ikasleri, unibertsitateko eta beste hezkuntza maila batzuetako irakasleri, hezitzaileri, gazteriaren arloko langileri eta gazteri.
Horiek dira urteko Erasmus+ txostenaren 2022ko edizioaren emaitza nagusiak. Txosten hori gaur aurkeztu du Batzordeak Europako Hezkuntzaren 6. Goi Bileran. Txostenak erakusten du programak 2022ko helburuak bete zituela; izan ere, parte-hartze handia izan zen eta funtsak modu eraginkorrean erabili ziren.
Txostenak agerian uzten du programak hazten jarraitzen duela. Erasmus+ programak 26 200 milioi euroko aurrekontua du 2021-2027 aldirako (2014-2020 aldian eskuragarri egon zen finantzaketaren ia bikoitza), eta arreta berezia eskaintzen die gizarteratzeari, trantsizio ekologiko eta digitalari eta bizitza demokratikoan parte hartzea sustatzeari.
2022ko txostenak Erasmus+ programak Europan eta Europatik kanpo hainbat mugikortasun jardueratan parte hartzen duten milioika pertsonen bizitzan duen eraginari buruzko informazioa ematen du. Erasmus+ programaren jarduera ezagunena ikasleen, langileen eta gazteen mugikortasuna da. Programak eragin positiboa du beren garapen hezigarri, sozial, pertsonal eta profesionalean, eta nortasun europarraren sentimendua sustatzen du. Nabarmentzekoa da mugikortasun tasak pandemiaren aurreko mailetara itzuli direla.
Informazio gehiago
2022ko urteko Erasmus+ txostena
Erasmus+ programari buruzko kontsulta publiko irekia
