Europar Batasuneko Berdintasuneko ministroak Iruñean bildu dira, emakumeen aurka sortzen ari diren indarkeriak desagerrarazteko esparru komun bat aztertzeko. Horretarako, biktimentzako laguntzan eta datu bilketan jarri dute arreta.
Ministro bilera informal hori Iruñeko Baluarte Biltzar Jauregi eta Auditoriumean egin da, EBko Kontseiluaren Espainiako Lehendakaritzaren esparruan, eta Espainiako Berdintasuneko ministro Ana Redondo buru aritu da.
Hala, azaroaren 25ean egiten den Emakumearen aurkako Indarkeria Desagerrarazteko Nazioarteko Egunaren bezperan, ministroek bi saiotan lan egin dute, “berdintasuna Europako politiken erdigunean jartzeko” eta Europa feminista baterantz aurrera egiteko, bilerara iristean Redondok esan duen bezala.
Emakumeen aurkako indarkeriaren adierazpen berriak identifikatu, diagnostikatu eta lantzeari buruz hitz egin da bileran.
Asmoa izan da indarkeria matxistako modu berriak, Istanbulgo Hitzarmenean berariaz jasota ez daudenak, batera lantzea, hala nola ziberindarkeria, indarkeria bikarioa eta indarkeria ekonomikoa. Hori guztia lehentasunezkoa da Kontseiluaren Espainiako Lehendakaritzarentzat.
