Txostenaren arabera, nahiz eta EBn energia garbiaren teknologiek oso lehiakorrak izaten jarraitzen duten kostuei dagokienez, oraindik ere kanpoko herrialde batzuen mende dago neurri handi batean, fabrikazio-gaitasunari dagokionez.
Europako Batzordeak 2023an txosten bat argitaratu du, energia garbiaren teknologien lehiakortasunean egin diren aurrerapenei buruzkoa, Energia Batasunaren egoerari buruzko 2023ko Txostenarekin lotuta. Bada, txosten horrek nabarmendu du EBk energia garbietarako trantsizioaren alorrean duen ahalmena handitu egin dela. 2022an, eguzki-energiaren eta energia eolikoaren ezarpen-tasa % 50 inguru handitu zen 2021arekin alderatuta, baina oraindik ere teknologia jakin batzuk inportatu beharra dago, eta mendekotasun hori gero eta handiagoa da.
Txostenaren arabera, EBko teknologiek lehiakorrak izaten jarraitzen badute ere kostuei dagokienez, manufaktura-industriak gero eta lehia handiagoari egin behar dio aurre. EB gero eta gehiago dago kanpoko herrialde batzuen inportazioen mendean, honako elementu hauei dagokienez: lehengaiak, tarteko osagai funtsezkoak eta energia garbiko amaierako teknologiak. Energia Garbiaren Teknologiaren Behatokiak lortutako ebidentzia da txostenaren oinarria.
Txostenak azpimarratu du Europako Batzordeak jada hainbat ekimen abiarazi dituela gai horri heltzeko. Itun Berdearen Industria Planak, Net-Zero Industriaren Legeak eta Lehengai Kritikoen Legeak honako helburu hauek dituzte: Europak net-zero teknologien inportazioekiko duen mendekotasuna murriztea, balio-katearen erresilientzia indartzea eta manufaktura-oinarri nazional sendoa eraikitzea.
