Bizikletaren erabilerari buruzko Europako Adierazpen baterako proposamenak, Europako Batzordeak hartutakoak, esaten du bizikleta garraiobide jasangarria, irisgarria, inklusiboa, eskuragarria eta osasungarria dela eta Europar Batasuneko ekonomiarako balio erantsi handia duela.
Adierazpenak bizikletaren erabilera bultzatzeko Europar Batasuna etorkizunean gidatuko duten printzipioak zerrendatzen ditu. Konpromiso argiak behar dira, hala nola bidegorri seguru eta koherenteen sarea hirietan, garraio publikoarekiko konexio hobeak, aparkatzeko leku seguruak, bizikleta elektrikoak kargatzeko puntuen garapena, eta txirrindularientzako bide azkarrak, hiriak eta landa eremuak konektatzen dituztenak, hain zuzen ere, estatu kide guztietan bizikletaren erabilerarako azpiegituren kalitatea, kantitatea, jarraitutasuna eta erakargarritasuna hobetzeko.
Honako hau adierazi du Adina Vălean Europako garraio komisarioak: «Segurtasuna ezinbesteko baldintza da bizikletaren erabilera bultzatzeko; izan ere, txirrindulariak erabiltzaile kalteberak dira –Europar Batasunean errepideko istripuek eragindako hildakoen % 9 txirrindulariak dira–. Azpiegitura seguruagoekin batera, hala nola bidegorri bereiziak, «sistema segurua»ren ikuspegiko elementu guztiak aplikatu behar zaizkie bizikletei zein autoei. Horien barnean daude abiadura eta errepideen erabilera segurua, baita trafiko arauak behar bezala betetzea ere. Bide segurtasunari laguntzeaz gain, Adierazpenak kalitatezko lanpostuen sorrera sustatzen lagunduko du, baita prestakuntzaren eta zikloturismoaren arloetan ere. 2022an, 14,7 milioi bizikleta fabrikatu ziren Europar Batasunean, hau da, % 29 gehiago 2012. urtearekin alderatuta».
