Batzordeak Espainiako Suspertze eta Erresilientzia Plan aldatuaren (PRR) ebaluazio positiboa aurkeztu berri du. Plan horrek REPowerEUri buruzko kapitulu bat gehitu du. Plana 163.000 milioi eurokoa da orain (83.000 milioi euro maileguetan eta 80.000 milioi euro dirulaguntzetan), eta 111 erreforma eta 142 inbertsio hartzen ditu barnean.
Espainiako REPowerEU kapituluak hauek biltzen ditu: erreforma berri bat, lehendik dauden hiru neurritan oinarritutako inbertsio handitu bat, eta REPowerEU Planaren helburuak betetzeko zazpi inbertsio berri, Europa Errusiako erregai fosilekiko independentea izan dadin 2030a baino askoz lehenago. Neurri horien oinarria da energia iturriak dibertsifikatzea, neurri txikiagoan egoteko erregai fosilen mende, batez ere elementu hauek bizkortuz: energia berriztagarrien ezarpena, hidrogeno berriztagarria, industriaren deskarbonizazioa, eta zero emisio garbiko industriarako balio-kateko inbertsioa.
Gainera, Suspertze eta Erresilientzia Plan berrikusiak 59 neurri jasotzen ditu, berriak direnak edo anbizio handiagoko helburuak lortzera bideratzen direnak. Neurri berrien helburuak dira Espainiako enpresa ehuna indartzea eta langile kualifikatuak erakartzea, nekazaritza sektorearen jasangarritasuna hobetzea, ekonomia zirkularra sustatzea eta basamortutzearen aurka borrokatzea, energia berriztagarrien proiektuetarako baimenak emateko prozedurak arrazionalizatzea, zibersegurtasunaren arloko arauak indartzea eta etxebizitza eskuragarriak sustatzea. Egin edo handitu nahi diren inbertsioek barnean hartzen dituzte finantza tresna berriak, ekonomian inbertsioak sustatzeko, adibidez, trantsizio ekologiko eta digitalei eusteko eta ETEen lehiakortasuna bultzatzeko.
