2023an, jaiotzako bizi itxaropena 81,4 urtekoa izan zen EBn, hau da, 0,8 urte gehiago 2022arekin alderatuta. COVID-19aren pandemiaren ondorioz 2020an eta 2021ean behera egin ondoren, bizi itxaropena 2019koa baino handiagoa izan da. Hori izan zen, halaber, 2002tik erregistratutako baliorik handiena, eta horrek erakusten du 3,8 urteko gehikuntza izan dela, guztira.
Informazio hori Eurostatek duela gutxi bizi itxaropenari buruz argitaratutako datuetatik dator. Artikuluak «Estatistika azalduak» artikulu zehatzagoaren datu berri batzuk nabarmentzen ditu.
Jaiotzako bizi itxaropen handiena izan zuen EBko eskualdea Espainiako Madrilgo Erkidegoa izan zen (86,1 urte), eta, horren atzetik, Italiako Trentoko Probintzia Autonomoa (85,1 urte), Finlandiako Åland (85,1 urte), eta Espainiako Nafarroako Foru Komunitatea eta Italiako Bolzano/Bozen Probintzia Autonomoa (biak 85,0 urte).
Aitzitik, jaiotzako bizi itxaropen txikiena zuten EBko bost eskualdeen artean, hiru Bulgarian zeuden: Severozapaden (73,9 urte), Severen Tsentralen (75,2 urte) eta Yugoiztochen (75,1 urte). Beste biak Hungariako Észak-Magyarország (74,9 urte) eta Frantziako Mayotte (74,9 urte) ziren.
EBko emakumeen kasuan, jaiotzako bizi itxaropena 84,0 urtera iritsi zen 2023an (0,7ko gehikuntza, 2022arekin alderatuta, eta 2019ko balio bera), eta gizonen kasuan, 78,7 urtera (+0,8, 2022arekin alderatuta, eta +0,2, 2019arekin alderatuta).
2023an, emakumeen bizi itxaropena gizonena baino 5,3 urte handiagoa zen jaiotzean, EBko herrialdeen artean aldakuntzak badaude ere. Adibidez, Letonian, espero zen emakumeak gizonak baino 10,1 urte gehiago bizitzea, Lituanian 9,0 urte gehiago eta Estonian 8,8 urte gehiago.
Genero arrakala txikienak Herbehereetan (3,0 urte) eta Suedian eta Luxenburgon (3,3 urte biak) erregistratu ziren.
